مانا من اللي يخربون المجالس =ولانا بمن يأتي على غير مقدار
ماضي الزمن شيد بصدري مدارس =اللي يهد الدار ما يبني الدار
ولانا بمن يسمع كلام العرايس=اللي يشب النار ما يطفي النار
وإن كان عاتبت الرجال الأشاوس =شفقان في خوة صناديد الأحرار
ولا اشفق على مجلاس قوم التهامس=وأرضى بحظي مع صواديف الأقدار
وآخذ عبر ودروس من كل فارس =ولا أدخل بيوت الناس من فوق الأسوار
ديني ودين النمنمة والدسائس =وديني ودين السلطنة والتجبار
واكره بشده قالبين الملابس =وأكره بشدة من يبيحون الأسرار
ولا ارتاح لأصحاب الوجيه النحايس =وارتاح للي ما يهابون الأخطار
وألعن هل العقبات واهل الفرايس =اللي ترمرم من ورى كل سنجار
وخصمي ببيت الشعر يقعد يداوس =أعطيه فتل ونقض من كل مسعار
وأقنى من أصناف المعادن نفايس =وأمشي على منهج بعيدين الأنظار
ولانا بكامل عن جميع الوساوس =الكامل الله قاصماً كل جبار
والحر يزعل من علوم الدنافس =ويزعم ويرقى مع طويلين الأشبار
والحر راعي زود وقت المقايس =يتعب على قولة نعم كل مشوار
ويربى بنفسه عن طباع الخلايس =وياخذ حلايا كل فارس ومغوار
ويراقب الله عن جميع الدنايس =ويرتاح باله في مجاليس الأبرار
العذر عاتبت الرجال الأشاوس=شفقان أبي خوة صناديد الأحرار
مانا من اللي يخربون المجالس =ولانا بمن ياتي على غير مقدار