السلام عليكم ورحمه الله وبركاته

بنات امانه انا بقولكم قصتي بس بليز اللي بتنصح باسلوب محترم تتفضل واللي بتجرح الله يخليها انا مو ناقصه

انا في البدايه بعطيكم لمحه شخصيه عن حياتي عشان تعرفون قصتي وتنصحوني عدل مدل

انا بالبدايه من صغرتي تعرضت لمرض اهو مو خطير ولا معدي بس متعب ومنه انا سويت عمليتين وبصراحه جايدين مو بيع برد وبهالطريقه منو يبي يتزوج وحده مريضه ومشققه ؟

بس امانه يابنات منو فينا ماتحلم بزوج يحبها وتحبه وعيال يملون عليها الدنيا
انا لاشفت عيال اخواني طار قلبي من الفرحه والوله عليهم شلون عيالي ؟
وانا بصراحه اكثر اهلي مهدولي طريج عدم الزواج بسوالف وييييه شتبين بالريل والله عباله البنت في بيت اهلها مريحه ومتكيه شتبي اكثر من جذي وانا رضيت وقبلت وبلعت السالفه
ولا رحت عرس قلبي عورني مو حسد للعروس والله حشا اتم اذكر الله مليون مره اخاف عيني تصيبها

بس مو هني المشكله المشكله اني عرفت شخص بالنت من ست سنين ويعلم الله ماتعديت حدود النت
لاكن مره من المرات شافني صدفه بسوق ومن الصدف اني تعرجبت جدامه واهو ضحك واحنا الاثنين ماندري عن بعضنا واساسا انا وقتها كنت ناقده عليه شيبي داخل محل هدوم حريم وبس شبكنا اهو سولفلي وانا سولفتله واكتشفنا انه شايفين بعض بدون ماندري

والله يعلم الله ماخربطت ولاكلمته تلفون بس حسيت انه كان يبيني وانا كنت اقوله عيب مو سوالفي مو معناته ظفتك مسنجر اكون فالته

وانا مصارحته بكل شي مرضي وتعبي يعني اهو عارف كل شي عني
وانا صدمني انه يبيني بالحلال بس انا مافكر فيه كحبيب بس حاسه انه اهو الفرصه الوحيده اللي بتيلي وفي مشكله ثانيه
اسمحولي يا البدويات مو قصور فيكم بس اهو بدوي وانا حضريه والاطباع تختلف
ساعدوني شنو اسوي انا محتاره والله

حبيبتي ... أول شي أبي اعرف جم عمرج ؟؟؟
وثاني شي مسألة البدو و الحضر هذه متعبتني أنا بعد ... الله يسهل كل أمورج و يحققلج مرادج ان شاء الله

هلا حبوبه انا مو صغيره عمري 24

بس 24 هم مو كبيرة .. تبين نصيحتي صبري بس اذا كنتي تبين الزواج بسرعة قبل لا يتقدم لج خلي اهلج يسألون عنه

النبي عليه الصلاة والسلام قال : اذا جاءكم من ترضون دينه وخلقه فزوجوه.. واذا انتي مرتاحة منه مافي مشكلة
ولا تعتبرين البدو والحضر مشكلة لانها شي تافه مقابل حياة جميلة ممكن تعيشينها

((بس اهم شي سألو عنه بدوامه وعند ربعه))

مشكوره حبيبتي عالرد
واكيد اكيد لو تقدم ان شاءالله نشخلهم بالسؤال وانا اهلي نوعهم لو صادوا زله صغيره مايزوجون يعني شي مو ظروري بقاموسهم الزواج
ادعوولي الله يوفقني لطريج الخير والصواب

عزيزتي مافي فرق بين الحضر و البدو و السنه و الشيعة ... كلنا كويتيين و عرب و مسلمين ... و ان شاء الله ربي يعطييج الي فيه الخير لج ... انتي صبري ... و الصبر مفتاح الفرج ... و بعدين 24 توج عنونه الحياة جدامج طويلة و جميلة بإذن الله ... فا أنا اقول صبري و ادعي ربج انه يسهل كل أمورج و يعطيج الي تتمنينه .

فرح الف شكر عالرد وصحيح مافي فرق بس احنا بمجتمع مثالي زياده عن اللازم ولازم نتأقلم فيه

حبيتي نصيحه توكلي على الله
اشتري اللي يبيج وبيعي اللي تبينه
وسالفه البدو الحضر ان شاء الله بتتاقلمين معاهم بس كل شي بالتفاهم
والله يسرلج امووورج