شنو تفسيرج للجمله: سوي خير و قطيه بحر ؟؟

السلام عليكم و رحمة الله تعالى و بركاته

اشلونكم خواتي شخباركم

طبعا احنا واااايد نسمع هالجملة

سوي خير و قطيه بحر .. سوي خير و قطيه بحر .. سوي خير و قطيه بحر

بس ....

هل في يوم قعدتي جذي و فكرتي ... شنو معناة هالجملة ؟؟ و شنو تفسيرج حقها ؟؟

انا بالنسبة لي بصراحة قعدت يوم و فكرت بهالجملة عدل ..

فكرت ليش اشمعنا نقوا البحر بهالجملة ؟؟ ليش مو النهر ؟؟

و انا اعرف ان البحر يروح و يرد .. بس النهر ما يرد بس ماشي

فاكتشفت ان معنى هالجملة مو ان الخير اللي اتسوينه انسيه خلاص و لا تنطرين احد يشكرج عليه

لاء .. المعنى الحقيقي ان سوي خير و قطيه بحر لانه راح يردلج .. سويه و انسيه و الله ما راح ينساه و راح يكافئج بمثلها او احسن ..

استناد للآية الكريمة {الله لا يضيع اجر المحسنين}

و للآية الكريمة: { و من يعمل مثقال ذرة خير يره} صدق الله العلي العظيم

و لو كان قصدهم ان انسيه و لا تنطرين جان قالوا قطيه بالنهر ..

هذا من وجهة نظري الشخصية ...

اشرايكم خواتي ؟

كل وحدة اتدش ما عليها امر اتعلق على وجهة نظري و تكتب وجهة نظرها

و خل انسولف عن هالجملة :teeth_smile:

مع خالص احترامي لكل وجهات نظركم و آراءكم

و بالتوفيق للجميع انشالله

(الموضوع مجهود شخصي .. الرجاء كتابة اصل الموضوع عند النقل)​

وجهة نظر صحيحة لحد ماااااااااااااااااااا

وتحتمل إنا نقول بعد نقطه بحر لانه عميق وغوره لاقرار له يعني لما نسوي الخير نرتجي الثواب من الله وحده وإلا الإنسان يمكن

يحمدنا أو مع الوقت يجحدنا لذا نقطه بحر

وجهة نظرج صحيحة يمكن هالخير يرد لنا بطريقة ثانية مع مد البحر

شاكرة لج هالموضوع وبانتظااار قراءة تعليقات خواتنا . . .يمكن يكتبون لنا وجهة نظر ثالثة

ومشكورةةةةةةةةةة حبيبتي​

اي ياقلبي هذا كان مثلي بس عدل قلت البحر كبير ارميه وانسى مااحب حد يشكرني اي توني انتبه على قولك النهر يمشي مايرد​

العفو اختي ام عبدالله

و انا كلي احترام لوجهة نظرج .. صح ممكن هم عمق البحر يعطي معنى

و انا ما قصدت ان ننطر الشكر من الناس لان الناس مثل ما تفضلتي بعضهم يشكرون و بعضهم لاء

و اصلا لمن انسوي شي و ننطر شكر الناس هذا ما يعتبر في سبيل الله و يكون رياء

كان قصدي ان ما ننسى و نكون على ثقة ان الله ماراح يضيع تعبنا و راح يكافأنا سواء بالدنيا او بالاخرة

مشكورة اختي على مرورك الطيب و انا بالفعل احب مرورج على مواضيعي

و موفقة دايما انشالله :smile:

مشكورة اختي على مرورج الكريم

و صح كلامج .. هم بعد ممكن ان كبر البحر و الراحة اللي انحس فيها لمن نشوفه خلاهم ينقون البحر

يعطيج العافية اختي

يلا خواتي شاركونا برايكم

بصرااااااااااااااااااااااااحه مافكرت فيه بهاااااذي الطريقااااااااااا كل مااقولااااا افكر ان قطيه وانسيه



بس حلوووووووووووووو تفكيرج فيه ومعلوووووومه حلوه يعطيج العافيه

الله يعافيج اختي

و مشكورة على مرورج الطيب

والله كلامك صحيح أرمي في البحر توني افكر فيها واعرف ان البحر مايقبل شئ دائماً نظيف ومتجّدد

أشكرك حبيبتي Aimee على روعة الطرح وانا استفدت منه وبروح اتفلسف على خلق الله
هههههههههههههههههههههههههههههههههههههههههههههههههه​

لووووووول

الحمدلله ان عمت الافادة على الكل

تسلمين اختي على مرورج الحلو

بالتوفيق للكل انشالله

يلا خواتي نبي ارائكم

الموضوع حلو و يستحق النقاش

انا بقووول رايي....

بس قبل لا اقوله احب اشكر اختي ايمي على فتحها لموضوع عمل الخير .... لاننا في وقت فعلا نحتاج الى قراءة وسماع مواضيع تشجع على فعل الخير ... وفي المقابل لا تنتظر اي رد ..... لانه المردود بيكون من الله سبحانه وتعالى ..
انا نشوفه بالدنيا ,,,, او يؤجل في الآخره ..

وبالنسبة لعباره اعملي خير وقطيه بحر ... هي جمله كانو يقولونها اجداد اجدادنا .... وهدفهم الاول ان يكون فعل الخير
متواجد دائما بينهم ... وملموووس ..... والهدف الثاني .. تربيه الاجيال القادمة على فعل الخير .. ويكون الخير دائما امامهم في تعاملهم فيما بينهم ..

وان شاء الله نكون من الاشخاص اللي يفعلون الخير ويقطووونه بحررررر




​

العفو اختي ولو

انا حبيت اناقش هالموضوع عشان ابين مفهومها الصحيح لان للاسف في ناس وايد فاهمته غلط

و في ناس اتقولها و بس ولا تدري شسالفتها

و بارك الله فيج على هالكلمات العطرة

و مشكورة على مرورج الاكثر من رائع

ماشالله عليج دايما متألقة

موفقة انشالله

خواتي شاركونا برايكم

انا اقول ان كلامج صح الي يسوي خير وقطه بحر راح يرد له من رب العالمين والله ما ينسى عباده
والي يسوي الخير هذا انسان بمنتهى اللطف والرقه واخلاقه وااايد حلوه والبيت الي تربى فيه بيت
ناس يخافون الله

وجهه نظرج جاااايزه بس موشرط انه معناه يردلج جان قالوا شي ثاني غير البحر (موكلشي تقطينه بالبحر يردلج)

انا افسرها انه البحر اكبر واعمق من النهر (مثل مايقولون بحر النسيان مو نهر النسيان) يايه بمعنى المسااااااحه والحجم

وهذي وجهه نظري الشخصيه ويسلموووووو

وجهة نظرك اقنعتني الى حد ما بس ماننسى انه يمكن يرد اولا يعني الخير يمكن مايرجعلك في الدنيا لا كن في الاخره مليون بالميه راح يرجع والله مايضيع جهد احد ابد
المستفاد احنا نجتهد وندري ان تعبنا بفعل الخير ماراح يضيع مادمنا مؤمنين بالله ومصدقين به
كما قلتي استناد للآية الكريمة (الله لا يضيع اجر المحسنين)

اي و الله صح كلامج

مشكورة اختي على مرورج الحلو

احترامي كبير لوجهة نظرج اختي

و تسلمين على هالمرور الطيب

بصراحة انتي اول وحدة اتقولي اني قدرت اقنعها تقريبا :teeth_smile::shades_smile:

و صح كلامج اختي دامنا نؤمن و نثق فيه راح يوفقنا و يرزقنا اكثر من اللي احنا انسويه

يعطيج العافية و تسلمين على هالمرور الحلو

موفقة انشالله