صباح الخير بنوتات صج صج متوهقه انشالله الي تحل مشكلتي لها الجنه قولوا آمين تدرون الحين الي ماتعرف تحط ميك آب تعتبر مو انثى خخخ والله احس اني مااعرف احط مكياج مو ليه حتى احيانا اكون حاطه اي لاينر فوق عيوني ورفيجاتي يضحكون عليه ويفشلوني يقولون متى تعلمين تحطين مكياج وكنت اطوف لان انا حلو علي الماسكرا والكحل بس اما الحين وضعي اختلف سلمكم الله انا داخله ع عايله يعني بتزوج وهالعايله كبيره يعني اكيد اول عرسي بروح وبرجع عليهم ولازم اكب الميك اب كب والا مااصير عروسه هذا مجتمعنا متخلف الحين المطلوب كل وحده تدش تقول شلون تبدأ بالميك اب خطوه خطوه من الكريم الاساس الى الروج واكون لكم شاكره؟؟
مــبــرررووووك يالغاليه والله يتمم لج على خير ويسعدج ويهنيج ويسخركم لبعض ويهديكم لبعض ويرزقكم الذريه الصالحه ولا يهمك أنا بعلمج أنا أعرف أحط ناعم و إن شاء الله خطوه خطوه تعرفين تحطين ميك أب أنتي متى عرسج؟؟
عالبركه ياقلبي المكيااج اسهل منه ماافي بس يبيله تدريب يعني يوميا حطي كل مكياجج عندج وجربي حطي يوم عن يوم راح تعلمين وحطي عاليوتيوب تعليم مكياج للمبتدئات وحطي بقوقل بحث الصور واكتبي تعليم المكياج وصدقيني راح تعليمنه وتعشقينه مثلي
اي والله تعلمي من الحين ولا تتوهقين مثلي خخخخخخخخخخ وفي بيوتيووب تعليم مكياااج يجنن وكذا موضوع اهني حاطين لج الرااابط وسهل تعليمهم لايطوووفج والله حلوو ..
مشكورين عالمرور لله يسلمكم طبعا الاخت الانسه عنابه مو مقصره معاي قاع تعلمني يعطيها الف عافيه ادعولها يابنات
السلام عليكم و الله ما تتفشلين و انا موجودة <<<<< شكوو؟؟؟؟ لووول لا صج انا أقدر أعلمج كل اللي تبينه اول شي .. مثل ما قالوا البنات .. دشي يو تيوب و شوفي الفيديوات .. و طبببببببببببببقي .. مو بس تشوفين و تسمعين و تطوفين .. ترى المكياج ما يبيله الا الممارسة و مع الوقت انتي راح تفنتقين بعمرج بدون محد يعللمج هذه الفيديوات اللي انا شخصيا استفدت منها YouTube - Makeup Tutorial--Deep Purple with a Twist using MAC Cosmetics ^ بهالفيديو ما عليج منها .. مو شرط مكياج ماك .. انتي استخدمي اللي يناسبج YouTube - **How to Contour/Highlight & Apply Blush** ^ هني تسوي كونتور حق ويهها .. تحدد ملامحها و تطلع لها حدود .. وايد حلو YouTube - Tips on Using a Stippling Brush with Liquid Foundation ^ هالفيديو اهو اللي علمني شلون استخدم فرشة ماك 187 مع الفاونديشن السائل أدري انه ريال يلوع الجبد لكن شرحه وااضح و مفهوم انزين الحين انا .. اول شي لازم تهتمين ببشرتج عدل .. لان البشرة الصحية تحلي المكياج سوي بخار كل اسبوعين اذا كانت بشرتج نظيفة و صحية .. لان البخار يطلع منها الاوساخ و الشوائب اللي تعلق عالبشرة من الجو عالاقل .. اما اذا كانت تعبانه سوي كل اسبوع مسحيها بتونيك مرتين باليوم اول ما تقعدين الصبح .. و بالليل قبل النوم المكياج .. اول شي غسلي ويهج و اهو رطب مو مبلل .. لا فيه شوية رطوبة .. حطي الكريم المرطب و بعدين بعد ما ترتاح .. حطي بيس اللي يناسب بشرتج .. استخدمي من ماركة غيرلان و بعدين .. حطي الكونسيلر .. عندج من الجوثن من ماركة ارتكو .. روووعة هالماركة حطيه باستخدام فرشة ماك 194 هم كونسيلر بوبي بروان وااايد حلو حطي الكونسيلر تحت عينج .. غطي اي بقع .. اثار حبوب او مناطق غامجة ببشرتج و الحين الفاونديشن .. طبقي الطريقة اللي حطيتها بالفيديو اذا كنتي بتستخدمين اساس سائل بعد الفاونديشن ابدي بمكياج العين انا بحط لج خطوات مكياج العين بشكل عام لاني ما اعرف شكل عينج و لا حجمها أول شي .. حطي بيس للشدو .. و الحين البيس اللي وايد حلو اهو من ماركة دييغو دالا بالما < موجودة هالماركة عند بيضون و مراكز تجميل الجمعيات (جمعية مشرف فيه) خليه ينشف شوي بعدين وزعي الشدو .. على كل جفنج .. او اذا كنتي بتحطين لونين .. اوكي لكن لا تحطين أكثر من لونين الالوان الصارخة ابتعدي عنها .. الاصفر و الأحمر و الفوشي لا يقربون من عينج انا ما اوافقج عالكلمة اللي قلتيها لازم اكب الميك اب كب !!!! صدقيني الناس ما يسكتون و لا يرضون عن شي اذا كثرتي بيقولون شدعوة عليها! و اذا خففتي يقولون شفيها فاهية؟!؟! فاعتدلي بالمكياج .. و حطي اللي يناسبج خليج عالشدوات الطبيعية .. بني رصاصي .. اسود طبعًا و كحلي و اذا تبين الوان فريحية .. خليها تحت عينج لانها تحلي العين و اهي الموضة هالأيام اشتري طقم اقلام كحل ملونة من مكياجي اسمه i-pencil kit فيه 6 الوان كحل رووووعة .. و نفسه طقم ثاني بس الاقلام فيها غليتر و اذا خلصتي من توزيع الشدو و الكحل تحت العين حطي كحل أسود .. خط رقيييييييييييييييييييق على خط رموشج العلوية و السفلية و عقب .. ممكن انج تسوين هالحركة اللي تكبر العين انج تاخذين شوية شدو اسود و تحطينه عند أطراف عينج الخارجية بس و تموهينه بالاسفنجة العادية مالت الشدو مع الكحل و تطلعين الشدو لي برة بالفرشة (تصير كأنه سموكي برة العين) و مع دمج الاسود مع الشدو اللي حطيتيه اول شي يصير مكياج فخم بس بسيط اخر شي .. حطي اضاءة حق عظمة حواجبج و دمجيها مع الشدو عدل .. فيه عند ماك نايلون .. بودي شوب و قلم آي برايت من بينيفيت رووعة لما تخلصين من هالخطوات الحين دور الماسكاارا اول شي استخدمي ال lash curler او عاقص الرموش .. مال بوتس حلو و رخيص عقصي رموشج و بعدين حطي الماسكارا عدل من فوق و تحت (اقصد من كل جوانب الرمشة) و فري فرشة الماسكارا و انتي تحطين عشان تطول رموشج و تفرقهم السوق الحين فيه وايد ماسكارات حلوه و مطورة جربي اللي يناسبج و لا تنسين تحطين حق رموشج اللي تحت بعد و اذا نشفت الماسكارا حطي طبقة ماسكارا ثانية عشان تسوين فوليوم حلو حق رموشج الحلوه *** اذا كنتي معزومة او رايحة عرس .. ممكن انج تستخدمين الكحل السائل او الكريمي >> فيه منه عند ماك + ميبيلن و ميك اب فور ايفير استخدمي معاه الفرشة .. الحين ميبيلين اهو التوب لكن الكريمي يبيله ممارسة مستمرة عشان تضبطين الرسمة و ممكن تطبقين الخطوات اللي قلت عنها للشدو لكن تزيدين عليها خطوة انج تحطين غليتر او لمعة للشدو تحت عينج او توزعينه على الشدو عند ماك في بيجمينت اسمه 3D بس غليتر قوي! تحطينه على اي شدو و يصير يبرق خلصنا مكياج العين .. الحين عندج اختيارين ... يا انج تسوين كونتور لبشرتج مثل الفيديو اللي حطيته فوق او انج تكتفين بالخطوات اللي بقولها تحطين بودرة الخدود .. حطي البودر على تفاحة الحد ... طالعي المنظرة و ابتسمي ابتسامة عريضة و حطي البلاشر على خدودج البارزة و من العظمة اللي حدام اذونج لي قبل خشمج بشوي حطي اضاءة او لمعة الفازلين و دمجيها مع الشدو شنو لمعة الفازلين؟ اهي لمعة تنحط حق الويه بعد المكياج عشان تسوي غلو للبشرة تنحط على عظمة الخد + منصف الجبهة + الذقن موجودة عند ماكس فاكتور + عند الهنود من ماركة مكياج + عند بينيفيت بس لمعة صدفية اسمها هاي بيم + انجلوت الافينيوز + ميك اب فور ايفير نسيت اسمها بعد ما توزعين الاضاءة الحين دور الحمرة .. اول شي حطي بيس للحمرة .. انا استخدم بيس مكياجي اسمه آي & ليب بيس من كوليكشن صبايا << عجيييب و بعدين حطي محدد اخر شي الحمرة .. الافضل انج نرسمين الحمرة بالفرشة عشان ترسمين شفايفج عدل تشطيبات أخيرة ... اخذي ورقة كلينكس .. سفطيها و مسحي ويهج عالخفيف عشان تمسحين الزايد .. و بعدين رشي المثبت على ويهج في من ماك (فكس بلس) دييغو دالا بالما (ميك اب فكسر) و ميك اب فور ايفير ما اعرف اسمه لكن ماكو غيره و الحمدلله خلصناااااااااااااااااااااااا ملاحظات أغلبية البنات يحطون بعد الاساس بودرة مضغوطة و فوقها بودرة حرة (لوز باودر) بهدف التغطية المثالية و ثبات الاساس انا ما أؤيد الخطوة هذه .. لانها تطلع شكل مكياج مصطنع خاصة الحين الجو حااار فيتسبب بتكتلات و و خطوط و البشرة مهما كان نوعها تدهن و تلمع نصيحة .. البودرة مو ضرورية .. لكن ممكن انج تخلين البودرة المضغوطة معاج بالجنطة عشان تمسحين بشرتج فيها اذا دهنت و لا شي و انتي برة البيت عند ماك بودرة شفافة اسمها بلوت باودر .. و مالتي من ريميل ايمها ستي مات هم شفافة و وظيفتها تغظي اللمعة ^ ^ ^ لا تخترعين من هالخطوات و الملاحظات اللي شكثرها بس انا قلتهم لانج تبين مكياج كامل .. اذا تبين مكياج ناعم قوليلي عالخاص و ان شاءالله أرد عليج هنيه عالعام عشان الكل يستفيد ادعيلي الله يحقق اللي ببالي و ينولني اللي أبيه و عسى الله يبارك لج و يوفقج و يهنيج و يسخر لج زوجج و حمولتج كللللهم و يحبونج و تحبينهم ان شاءالله
ماشاءالله الاخت mai ماقصرت ... حبيبتي انا بحطلج كذا وحدة تحط باليوتيوب وانا استفدت منهم وايد هذي انا اعتبرها توووووب ...اسمها جينيس وهذا الرابط...اول مايفتح شوفي فيديو السموكي البني مع المشمشي عجيييييييب يكون الفيديو الثاني او الثالث YouTube - jennissemakeup وهذي بعد توب ..اسمها ماغي YouTube - maggiealex8380 وهذي حلو وبسيط... اسمها كاندي YouTube - kandee johnson وهذول بعد.... YouTube - pixiwoo YouTube - make up geek واذا تذكرت بعد حطيت وان شالله اكون افدتج ومبروك الزواج حبيبتي
إخت Mai_q8 وأرنوبه بجد ماقصرتوا مع البنت عسى الله يوفقكم دنيا وآخره ويحقق لكم كل اللي تتمنونه ويرزقكم من واسع أبوابه اللهم آمين
ولو حبيبتي ماسوينا شي ...وان شالله تكونين استفدتي واي شي تبين انا حاضرة .... ونسيت اقولج بعد احمد قبيسي وايد حلو في الثقيل وفي الخفيف شوفيه باليوتيوب :wink_smile: والله يوفقج حبيبتي
حبيبتي ما سوية شيء تستاهلين أكثر وكافي دعواتج الحلوه يالغاليه مــووووفـــقـــه يارب و يسعدكم ويهنيكم و يسخركم لبعض ويرزقكم الذريه الصالحه
يااا حياتي انتوا.. ما سويت الا الواجب .. و اذا اييي بنت اطلقت نداء الاستغاثة للمكياج .. لاااا تتردون و تراسلوني و انا ان شاءالله بالخدمة عسى الله يوفقج و يوفق كل من دعتلي و ينولكم اللي ببالكم ان شاءالله
