من ابداعي في حصة العربي .. حياكم خواتي

السلام عليكم و الرحمة و الاكرام

اشلونكم خواتي شخباركم

في يوم من الإيام كان علينا عربي حصة تعبير

عاد انا بالنسبة لي بصراحة بدون زعل (مع ان اهي حصة لغتنا الاصيلة) حصة ثقيلة و ما احبها

يمكن لان الابلات فيها للاسف ما يستخدمون طرق يديدة بالشرح يعني كله طريقة السرد المملة (مع احترامي لجميع الابلات )

الابلة قالت كتبوا خاطرة

و انا مو وايد تعبيري حلو يعني زين حق الامتحان الحمدلله

المهم انا قاعدة جذي و افكر شنو اكتب شنو اكتب ... جان ايي ببالي ابوي حبيبي :smile: :rose:

جان اكتب هالخاطرة اللي اهدديها من كل قلبي حق ابوي الله يخيلي اياه ويا امي

اسمها .. "نعم .. انه ابي"

رجل احبه بل اعشقه
احب حنانه و عطفه
احب نصائحه و ارشاداته
احب حرصه و خوفه علي
تغمرني فرحة لا تكاد توصف عند رضاه عني
اقبل خده و يده كل يوم بكل فخر
احاول دائما ان اجعله مرفوع الرأس فخرا بي
فشكرا الهي على هذه النعمة التي لا اعرف كيف اشكرك عليها
اني اعشق هذا الرجل الذي هو كل حياتي
يصعب علي العيش بدونه
نعم .. انه ابي
رمز العزة و الشموخ و العلياء
ابي الحبيب .. كم احبك
احب بسمتك و ضحكتك
فكلي اعجاب بك و بخلقك و علمك
و بكل معاني الانسانية فيك يا ابي
تفكر بمصلحتنا قبل كل شيء
تؤمن لنا طلباتنا بصدر رحب
و في منتصف الليل .. تقوم لتطمئن علينا
ابي .. كم احبك
نعم احبك و بكل معنى الكلمة اقول
نعم .. انه ابي
رب اسرتي و ولي امري
و اتشرف بكونه ابي
احبه و احبه و احبه
و لو بقيت طول العمر اخدمك ما وفيت ولو بجز بسيط من فضلك علي
فداك روحي و دمي
نعم انه ابي
و بكل فخر اقول ..
نعم .. انه ابي

و انشالله تعجبكم خاطرتي

و سوري لو طولت عليكم خواتي

و بانتظار ردودكم

و بالتوفيق للجميع انشالله

يسلموووووووو حبيبتي.......

كل فتاة بأبيها معجبه........

الله يخليه لكم ويخليكم له........

والوالدين مهما كتبنا عنهم مانوفيهم حقهم.........​

خاااطرة رااائعه أكيد الابله لما قرتها طيرت عيونها وبعدها طخت وفهمت إنه الوالد الله يحفظه لج​

خوووش خاااطرة

تسلم الأنااامل ​

تسلمين اختي

اي و الله لو نقعد من اليوم لي باجر نمدحهم و نقول فضايلهم ما انخلص

يعطيج العافية اختي عالمرور الكريم

الله يسلمج اختي

الابلة صارلها ساعة و اهي تمدح بخاطرتي و اتقول احسنتي و بارك الله فيك و جزاك الله خيرا :teeth_smile:

و خذت دفتري و كتبتلي بارك الله فيك عالخاطرة

اهم شي اني كنت كاتبتها باللون الاحمر بالدفتر لوول .. بس اشوة الابلة مشتلي اياها :tongue:

و مشكورة اختي عالمرور الطيب

الله يسلمج اختي ام عبدالله

و مشكورة على مرورج الرائع :smile:

يعطيج العافية

و بالتوفيق للجميع انشالله

صح لسانج وعلا شانج على الخاطره الروعه ’’’
والله يخليلج الوالد ان شاء الله’’’

تسلمين اختي "السنافية"

و مشكورة على مرورج الطيب