السلام عليكم يا بنات اليوم يايبه لكم طريقه شاورما دياي تسوينها بالبيت وايد احلى من المطاعم والكل راح يطلبها منج وانا سويتها ورشه عمل حق مدرسات مدرستي ووايد عجبتهم والحين الطريقه ديايه مسلوقه ومنتفه مثل الشاورما - بصل اخضر مع الاعواد الخضراء - 2او 3 شده بقدونس - زيت - 3 او 4 فصوص ثوم مدقوق - 2 جبن كرافت(العلبه الزرقاء)-مايونيز-خيار مخلل- رشه ملح -رشه فلفل اسود- خبز لبناني خفيف (طازج مو بايت عشان لا يتشقق) والحين الطريقه: اول شي حطي الزيت في مقلى وبعدين الثوم لمده ثواني بس قبل لا يحترق وبعدين حطي البقدونس مع البصل الاخضر وحركيهم لمده دقائق (لا تكثرين الحمس عشان لا يحترق ويخرب الطعم)وبعدين حطي الدياي وحركيه لما يختلط مع الخضره دقايق بس وعطيهم رشه ملح ورشه فلفل اسود واخر شي حطي الجبن بعد ما تقطعينه مربعات صغيره عشان ما يتكتل ويتوزع عدل وخليه لما يذب الجبن ورفعيه من النار وحطيه بصحن ثاني نيي حق الخبز تكونين قاصه الخبز بالنص ولكل نص ينفتح عن الجزء الثاني يعني طبقه وحده خبز وكل خبزه تصير 4 قطع ومسحي الخبز بالمايونيز خليه طبقه متوسطه لا خفيفه وتصير ناشفه ولا وايد وتدمر اللي ياكل وتبهذل الدنيا وبعدين تحطين المخلل اللي مقصص شرايح بالطول وتلفين الخبزه بشكل رول وبعدين غلفيها بقصدير او ورق المطبخ النشاف اللي حق القلي وبسس وبالعافيه على قلوبكم
هلا والله حبيباتي شلونكم اشكركم علىة مروركم بموضوعي وعليكم بالعافيه ان شالله ونشوفكم في طبخات ثانيه ان شالله
هلا والله حبيبتي زنزون اسفه توني اشوف ردج وبالنسبه لصدور الدياي اكيد تقدرين تحطينهم بدال الديايه الكامله وبالعافيه
يمي يمي شكله لذيييييييييذ يعطيج الف عافيه لازم اجربها حق رمضان بس حبيبتي ممكن تقولين لنا طريقتج في فوح الدياي ؟؟
هلا حبيبتي ام عزيز بالنسبه لفوح الدياي عاد انا استخدم جدر الضغط بأني احط الماي مع الملح والبهارات الحب (الدارسين _ الهيل _المسمار _ ورق الغار ) واسكر الجدر واخليه لمال يطلع صوت وعقبها اخليه ربع ساعه بعدين اخلي البخار لما يطلع كله وافتح الجدر وبس
