الشتاء جا وابغا اعلمكم على مشروب لاهل الحجاز عندنا في أيام البرد نشربه نسميه ((قهوة اللوز واخرون يسموها اللوزيه أو الملوز )) اليكم المقادير و الطريقة : 1- حليب سائل او سويه كاس ماء وثلاث ملاعق حليب بودرة. 2- كمية من اللوز الحجازي المقشر ومطحون جرش أو الفول السوداني بس ما يكون محمص انا بستخدمه لما اتزنق وما عندي حجازي . 3- دقيق الرز. 4- هيل - ممكن(( ملعقة صغيرة جنزبيل مطحون - جوز هند مبشور - سمسم محمص حسب الرغبه). 5- سكر. الطريقة: نغلي الحليب 2لتر(كل لتر أربع كاسات) نضيف له الهيل ست حبات كفايه تتكسر بس ما تنطحن ونضيف كاستين من اللوز المجروش ((بعد ماينسلق في ماء حار بس دقايق عشان يخرج القشر بسهوله ))والسكر حسب الذوق ممكن تخليه بدون عشان فيه ناس عندها مرض السكر نخلي السائل يغلي مع التقليب مدة ربع ساعه على الاقل اللين تحسي انه اللوز بدأ يلين . - نجيب كميه من دقيق الرز بمعدل ملعقة لكل كاس ونذوبه في ماء بارد ممكن كاسه ونص ماء ونضيف المخلوط للحليب ونقلب بأستمرار اذا شفتي انه القهوة خفيفة زودي الرز واذا هيه تقيله زودي ماء وقلبي اللين تشوفي قوامها زي اللبن الرائب او اثقل شوي . - ممكن تضيفي الي تحبيه أو كلها من الجنزبيل او الجوز او السمسم بتذوقي طعم تحتاري فيه اطعم من سحلب المصارية طريقة التقديم صبي القهوة بكبيات وانتي تصبي اخلطي كويس عشان يكون في كل كوب كميه من اللوز المجروش هوه سر الطعم لهاذي القهوة لازم الى جانب كل كوب ملعقة صغيرة لانه ممكن تحتاجيها في الشرب او أكل اللوز . اذا شربتيه وعجبك ادعيلي بالجنه بغير حساب وحتى لو ما عجبك برضه ادعيلي.