السلام عليكم ورحمه الله وبركاته.. تعاالوا معي نتذكر أيام الورعنه.. والبزرنه..<< ياهي أياام تهبل وروعه وكل شي فيها له طعم.. شوفوا كيف.. صبّحكم بالخير يالعمال العماليه . مسّاكم بالخير يالعمال العماليه ماتعطونا بنتكم الحلوه الجميله . مانعطيكم هيا الإ بالف وميه ندخل على دياركم ونكسر أبوابكم . . . وهذي عروستنا هذا الزمن اللي عشناه فيما مضى عصر ماقبل البطاره عصر الورعنه أعتقد كل شخص فوق ال 17 مر على هذا العصر الأغبر .. واللي مامر على هالعصر لايكمل يقرأ الموضوع علشان برستيجنا مايهتز هالزمان راح أقسمه لأيااااام .. علشان تعيشو الجو .. . أياااااام الكشخه00 اللاااااااااااااه 00 الكشخه فينا تلبس الطوق والبكله والشراب القصير أبو كشكش وحاطه من الروج الأخضر السحري "اللي بعد خمس دقايق يقلب أحمر .. كأنها مصاصه دماء .. " ماعاد الشكل يصير برئ هي وذا الروج واللي تلبس الفستان المكسره "اللي من تحت مليان جيبون" اللي حزام الفستان يسحبل بالشوارع وله كتافات أسفنجيه عاليه الجوده<< والله أبوي شرالي واحد من السوق يومني ثاني إبتدائي ولونه برتقالي بسبب نجاحي,, بغيت افطس من الفرحه فيه.. والحين ودي فيه عشان البسه للحفله التنكريه..خخخخ وماننسى طبعا مبدا الزي الموحد عند العائلات .. ثنين ولاثلاث من البزارين لازم طقم.. انا واختي تمينا نطقم مع بعض سنين لين رابع أو اولا متوسط هع<< تعقدت منها اياااااام بقاله اليماني,, الوحده منا تركض للبقاله بقميصها القطن "اللي شاريته لها أمها من البياعه اللي تجي عند بابهم " تشتري عصير سانكست.. وتشتري معه البسكوت الأخضر للي بالموز ولا بسكوت ابو ولد >>>> يالله كرم النعمه ولا بريد ابو صاروخ "البرتقالي - والأحمر - والأخضر - والأصفر" اللي يتقاسمونه ورعان البيت كلهم ويحظها لو صارت العلبه لها لحالها يقعد ثلاث ايام بالثلاجه وهي تلط منه أياااااام التصرفات الهمجيه<<وااكثرها حدث ولاحرج .. مدري عاد هالتصرفات توارثتها الأجيال ولا لا بقلوب صافيه كنا نزعل ونرضى من اللي زعلنا بسرعه بس شرط أساسي أصبعه الخنصر لازم يتصالح مع أصبعي أنا <<< لا بس هذي تهون عند طريقه الحلف " لاحول ولاقوه الأ بالله " حط أصبعك في فمك ولازم يمتلي الأصبع من السعابيل وبعدين مردغ فيها حلقك .. الحين تصير صادق أما اللي بيعلم أنه تسذوووب يمد لسانه ويطير لسانه بأصبعه >>>> ماأعتقد اني وفقت بهالشرح أياااااام التلفزيون00 طوووووووووووووووووط >>>> فجرت أذانيكم صح والشاشه الملونه ولا ترن ترررن تررررن ترررن >>>> هذي النغمه لمّا يحطون شاشه الساعه .. ومن تجي عشر .. يبدا القران وبعد أفلام كرتونهم الماصله أنا أذكر بشار اللي ضيع أمه والدببه اللي بمدينه النخيل وحبيب قلبي الليث الأبيض >>> ماني بصاحيه كنت أحب الحيوانات مو الأوادم .. بس تطورت وحبيت روبن هود وزورو وهايدي وسالي .. هذا التطور يمكن على اخر ايام الأبتدائي<< ابي افضح نفسي عندكم كنت أقول لأمس قفلي التلفزيون بروح الحمام(( الله يكركم)) عشان لاتخلص علي!! وصرت أتابع أفتح ياسمم .. وبدر وأنيس .. ياحبي لهم >>>> الحمد لله والشكر من بعد شخصيات الكرتون .. صرنا نحب أنيس وبعد هالتطور صرت أتابع برنامج الأطفال وأغانيهم الماصله والأفلام الهنديه .. اللي كانو يجيبونها على القناة الثانيه فلم الولد والفيل وفيه فلم ثاني اللي الحرمه تقطع العقد اللي لابسته عند المعبد >>> يعني طلقت زوجها وبعد التطور " أمحق " تسنعنا وصرنا نتابع مسلسلات "مسلسل عبدالله البحري وعبدالله البري" .. "ومسلسل عواد" .. "وصح النوم" .. "وفايز التوش""ومسلسل جواهر .. اللي فيه زوينه وحمد وجواهر "<< ماكنت احب زوينه الشريره وكل شي ولا اذا جات دعايه مالك الا تجيب مخدتك وتنسدح واسحبها نومه>>انتظر يا حلو لين يجيك الربيع حشى مو دعايه نص ساعه والألععاب كوم ثاني .. عشاني البكر عند أهلي ماخليت لعبه ماشريتها.. المكعبات ولعبه القطار ولعبه طقم الدكتور ومافي دراجه ماشريتها<< تقال ولد .. ألين اولى متوسط وانا شاريها أيااااام الأناشيد00 متى يجي بابا يجي الساعه سته راكب ولا ماشي راكب باسكيلته حمرا ولا بيضا بيضا زي القشطه >>> واااو والله ترااث بجد.. (((سويره))) راحت البر تجيب العيش الأخضر واتحطه بالصواني على جية خوالي خوالي يا دلالي اللي معي من هذاك الزمان<<< كني الحين عجوز... تجي تسدح ذكريتها هنيا ودنا نبسط انفسنا... واللي ذكريتها ماش برضه تكتبها .. اش شريتي من ملابس ومن العاب ومواقف تدل على الورعنه.. ههههههههههههههههههههههههههه
