الزيــن عشـقي " >> روايه كويـتيه حب في حب

السلام عليكم ورحمة الله وبركاته


هذي قصة منقولة من منتدى كويتيات للعضوة همسات حالمة <<<موتدشون المنتدى تقرونها

وحبيت انقلها لكم يأأحلى منتدى سيدات الكويت

وابي تفاعل عشان انزل البارتات
:teeth_smile:

وهذا البارت الاول
------------------------------------------------



" الزيـــن عشـقي "

الجزء الأول

حوش بيت بو عادل في الضاحيه

أوائل التسعينات

نـاصر: عادل تعال بيتنا يايب لعبه يديده راح تعجبك حيـل

عادل : هيااا يلا يلا خل نروح عيل

الزيـن : ابي اروح معاكم

ناصر : لا لا انتي ممنوع تدخلين بيتنا ما ابيج تيين

الزيـن : ليـش؟؟ والله ترى اعلم امي

ناصر : علميها (جان يقوم يدزها وطاحت على الأرض جان يضحكون الصبيان وركضوا والبنت بطتها بجي )...

الزين : ماااماا ماامااا ( واهيه تركض تصرخ وتبجي حيـل تدور امها )

* الزيـن اخر العنقود ودلوعة امها وابوها عمرها 6 سنين وعليها جمال مو طبيعي عيونها واسعه كبار وشعرها أسوود كثيــف ناعم وبيـضه وتقاسيم ويهها تهبل وعليها حواجب سووده مرسومه من الله يعني باختصار البنت تزوغ القلب من صغرها

ام عادل: ها يمه شفيج شفيج؟

الزيـن : يمه شوفي ناصر دزنيييي

ام عادل : وي يا يمه كل مره هذي حالتج معاه بس يبجيج...عمري مالج شغل فيه ياهل

الزيـن : لا يمه زفيـــه زفيـــه

ام عادل : خلاص ولا يهمج الحين اكلمه وازفه بس انتي لا تبجين حبيبتي خلاص

(ولمت ام عادل بنتها وتحاول تراضيها )

الزيـن : اكره ناصر اكررهه ما احببببببببه

ام عادل : انزين بس هدي هدي

الزيـن : ما احبببببببه ( واهيه تصرخ ومعصبه وتحاول امها تهديها وتراضيها )


"بعد مررو 12 سنه "

الزين صارت احلى من اول بمليوون مره فيها انوثه طاغيه بكل معنى الكلمه وشعرها اسود طوويل كثيف لحد ظهرها وجذااابه وجسمها اينن وطولها حلو باختصارجمالها سااااحر

الزين وامها قاعدين على طاولة الاكل يتريقون الساعه تقريبا 10:00 ...بيـتهم وايد راقي وناس حالتهم وايد زيـنه وخيرهم وايد....

الزيـن : يمه احبببببه احبببه امووت عليــه

ام عادل : يمه درينا خلاص درينا انج تحبينه بس وطي صوتج لا يسمعج ابوج ولا اخوج

الزيـن : شسوي يمه ودي بس امشي واقول حق العالم اني احبببببببه احبببه وااي اموت على شي اسمه ناااااااصر

( اي نعم ولد ييرانهم ناصر اللي كانت ما تواطنه بعيشة الله صارت تحبه بجنوون تحبه بكل ما فيها واهوه بعد صار يموووووت عليها...ناصر أكبر من الزيـن بسنتين يعني الحين صار عمره 20 سنه ويدرس في كلية العلوم الادرايه وبقاله سنه ويتخرج..شاب خلوووق ويخاف ربه وصاحب نكته وروحه مرحه وجذاااااب حيـــل حنطاوي وويهه بشوش وعنده سكسوكه وجسمه حلو وعنده جتوف(كتوف) بس مو مجسم وطويـل واحلى ما فيه شعره الأسود الكثيف وضحكته اللي تاخذ العقل وغمازته اللي على خده اليمين اللي تحلي ضحكته اكثر واكثر )...

الزين تقول كل كل شي حق امها واهيه اعز صديقه لها ما تخش عنها شي والحلو في امها انها على طول تاخذ وتعطي معاها وتثق في بنتها حيـل لانها واثقه من تربيتها لبنتها وفعلا الزين بنت خلوقه والكل يمدح فيها وفي أخلاقها والأم عارفه ان الحب اللي بينها وبين ناصر حب عذري برئ مو أكثر.

تلفون الزين يرن...( جنـوني يتصل بك )

الزيـن : واااي حبيبي عمره طويـل ( وشالت الخط وطلعت من الصاله وراحت غرفتها ) هلا بقلبي ورووووحي

ناصر : هلا والله..انزين قلنا خريجه بس مو تشوفين نفسج علينا عاد

الزيـن : لا والله في بالي من اول ما قعدت من النوم اكيــد بس اعطيك فرصه تشتاقلي

ناصر : أقول أقول لا ترقعين حق روحج...انا اوله عليج وانا معاااج

الزيـن : اااااخ قلبي بس ما اقدر على الكلام هذا انا....شكنت تسوي؟

ناصر : والله ماكو منسدح بفراشي أفكر فيج

الزيـن : انزين نصوري ودي أشوفك اطلع بره البيت شوي خخخخ

ناصر: ليش تبين تشوفيني؟

الزيـن : بتذكر شكلك !!! يعني ليش ابي اشوفك مثلا؟ خخخ يالله ولهانه عليك اطلع ابي اشووفك

ناصر : هههههه الحين امبجر حيل ويرضيج اوقف بالشمس يعني

الزيـن : ابي اشوفك الحين يعني ابي اشووفك ولهانه عليك ابي اشووفك اطلع يلا بسرعه

ناصر : انزين وانا ابي بعد اشوفج شلون يعني الحين ؟

الزيـن : لا مو شغلي يلا نصووري لا تضيع وقت بسررعه قوم البس اطلع

ناصر : يبه زين زين عطيني دقايق وامري لله طالعلج...حابه اسويلج بعد show وأغنيلج بره مره وحده دام بطلعلج

الزيـن : هههههههه لا بس ابيك تطلع القي نظره عليك وتدخل

ناصر : حاااضررر

( بيت ناصر قبال بيت الزين على طوول ودريشة غرفتها تطل على بيت ناصر بس اهوه غرفته ما تطل على الشارع...مع ان ناصر تكانه وشخصيته قويه بس الا الزيــن ما يقدر يرفضلها اي طلبببب )
قام ناصر بسرعه فز من الفراش ودخل الحمام ( عزكم الله ) وغسل ولبس بسرعه جينز وبلوزه ولبس تكرمون انعاله وطلع من غرفته...شاف امه واخته قاعدين في الصاله ( غرفة المعيشه )

ناصر : صباح الخيــر

ام ناصر : صباح النور..ها وين رايح من صباح الله خير ؟

ناصر : اممم بس بروح اييب شغله من سيارتي

ناديه : انزين نصور طلعنا انا ونور اليوم عفيه

( ناديه اخت ناصر الكبيره عمرها 24 سنه بعدها مو متزوجه مع انها مملوحه وخلوقه وخريجة حقوق..ناديه شخصيتها قويه وتحب الاستقلاليه وما تحب احد يفرض عليها شي وهذا اللي خلاها ترفض كل اللي تقدمولها...نور اخت ناصر الصغيره عمرها 16 سنه وحدها كيوووت وحبوبه حيل وقريبه من اخوها ناصر وايد..ام ناصر حوالي عمرها 45 سنه يعني مو وايد كبيره واهيه انسانه راقيه ومحافظه على نفسها...اما بو ناصر فاهوه دايما رجل اعمال ودايما مشغول وعلى طول مسافر...حالتهم الماديه اكثر اكثر من زيـنه )

ناصر : امممم خلاص ولا يهمج فكروا وين تبون تروحون وقولولي..يلا دقايق الحين راجع
( الزيـن صارلها حوالي ربع ساعه واقفه عند الدريشه تنطر وتنطر )

الزيــن : اووف ويــنه شقاعد يسووي!!!

شوي جان يطلع ناصر والزين فز قلبها...

الزيـن : واااي كاهوو ( صار ودها تنط من الدريشه وتروحله )

ناصرواقف في حوش بيتهم بس مو قادر يطالع صوب دريشه الزين عدل لان الشمس كانت بعينه...بيت ناصر له ارتداد كبير وفي حديقه بس سور البيت مو عالي فيبين على الزين حوش البيت
الزين دقت عليه

الزيـن : ههههه خلاص عمري شفتك يلا الحين ادخل عشان الشمس لا تحرقك

ناصر : خلاص بس يعني شبعتي من شكلي؟

الزيـن : لا والله ما شبعت بس حرام كسرت خاطري

ناصر : انزين المره اليايه دورج

الزيـن : اي يصير خير خخخخخ يلا بااااي قلبي انت

ناصر : خخخ يلا باااي يا قلب ناصر

( ناصر خلص مهمته ورجع البيت وراحلهم الصاله )

ناديه : ها وين الشغله اللي رايح اتييبها ؟

ناصر استوعب : اي هاا ما لقيتها تصدقين

ناديه : اي اها اوكي علينا هالكلام

ناصر ضحك وقالها : بس عاد مالج شغل...يمه ابي اكلمج بخصوص الزين
( كل اهل ناصر كانوا يعرفون عن الزين وانهم يحبون بعض حيل من سنتين )

ام ناصر : اي يمه حبيبي قول

ناصر : يمه احنا على اساس كنا متفقين ان تتخرج الزين من الثانويه واتزوجها والحين الحمدالله تخرجت وماكو شي يمنعني اني اتزوجها

ام ناصر : بس والله انا اقول لو تكمل دراستك احسن وتكون نفسك وبعدين تزوجها

ناصر : لا يمه وين شنو لا لا ما اتفقنا على جذي!! ما اقدر يمه ابيييها ابيييها...وبعدين اول وتالي بتزوجها ليش نماطل بالسالفه
ام ناصر : وكلمت البنت بالموضوع؟

ناصر : اي يمه كلمتها اكيييد واهيه مستعيله بعد على الزواج حيل بس خايفه من شغله

ام ناصر : شنو؟؟؟

ناصر: خايفه ان ابوها ما يوافق !

ام ناصر: ما يوافق!!! ليش بالله ما يوافق؟! انت شنو قاصرك؟!! اصل وفصل وولد ناس ومتربي ووسنه وتاخذ شهادتك ووتخرج

ناصر : لا يمه مو جذي بس تقولي ابوها وايد يخاف عليها وان احتمال ما يرضى بنته تتزوج الا لما تتخرج من الجامعه وتاخذ شهادتها!! ووايد 4 سنين وانا ابيها اليوم قبل باجر

ام ناصر : خل نتفاهم مع ابوك ونشوف شنو نسوي والله كريم

ناصر : الله كريم

بيت بو عادل

عادل : صباح الخيــر يا احلى ام في الدنيا

ام عادل : صباح النوور حبيبي يلا تعال تريق

الزيـن : احم احم صباح الخير

عادل : اااه انتي اهني!! تصدقين ما شفتج؟ >> يستعبط

الزيــن : يا سلام

( عادل طبعا اخو الزيـن الكبير واهوه ورفيج ناصر من عمر ويدرس في كلية الاداب طويل وتقاسيم ويهه حلوه وأبيضاني ومتروس شوي ويمووت على شي اسمه بناااااات )

عادل ما عطاها ويه وكلم امه: يمه توني كلمت ناصر رايح معاه نتريق بره

الزيـن اول ما سمعت ناصر فز قلبهااا

الزيـن : انت ليش طلعاتك وايد مع ناصر.؟ بعرف تطلعون شتسوون؟؟

عادل : وانتي شعليــــج؟؟ نطلع نروح نيي انتي شدخلج؟

الزيــن : لا بس ماكو شي بس قاعده استفسر لان كل يوم والثاني طالع معاه ما عندك ربع غيره
؟؟

عادل : طااع هذي وانتي كل يوم والثاني مع حنان مالج رفيجات غيرها؟؟؟ انا أصلا ليش واقف اتناقش معاك!! يلا اقول باي باي


الزيـن راحت غرفتها على طول ودقت على ناصر


ناصر : هلاااا والله بالزيـن كله


الزيـن : هلا فيك...ما قلتلي انك طاالع؟؟


ناصر : اي والله ما كنت حاط في بالي بس دق علي اخوج وقالي امش نطلع


الزيــن : وين رايحين؟؟


ناصر : احتمال نروح مارينا كرسنت نتريق


الزيـن : نصوري عاد لا يخربك اخوووي انا اعرف سوالفه هذا مع البنااات ويمشي ويتحرش بخلق الله...انت دير بااالك تزل عيينك مني ولا منااااك


ناصر : ههههههه لا يبه انا الزين كله عندي ما افكر اروح اكلم اي وحده غيرج


الزيـن : ولا حتى تحط عينك بعين اي وحده مو بس ما تكلمهمممم


ناصر : خلاص امشي وعيوني بالأرض زين جذي؟


الزيــن : اي حبيبي يكون احسن بعد


ناصر : والله انتي


الزيـن : عسل ادري


ناصر : هههههههههه احبببببببج يا جنووووني وهوااااي


الزيــن : وانا اموووووت فيييييك انت نصووري انا وبسسسسس


ناصر: انا كلي لج يا بعدي....اقول حياتي ابي اكلمج بموضوع بعدين بس الحين لازم اطلع حق اخوج لان قاعد يدق علي ماشي؟


الزيــن : خلاص حبيبي اوكي ودير بالك على روحك


ناصر : ولا يهمج يا قلبي بااي


الزيـن : باي حبيبـي


شوي جان تدق حنان رفيجتها


الزين : اهلا اهلاا


حنان : اهلا فييج والله...ها داقه عليج بقولج شتبين نسوي اليووم؟


الزين : وبعدين معاج كل يوم لازم نطلع؟


حنان : بعد معطلين وما عندنا شي..امشي امشي خل نطلع نروح السوق


الزين : انتي عارفه نصوري ما يحب اني اطلع كل يوم..شرايج اتيين بيتنا؟؟


حنان: لاااا عااد زينوو خل نطلع فيني طلعه خل نطلع


الزين : شوفي تعالي عندي بالأول نقعد شوي واذا كلش كلش زهقنا اكلم نصور ونشوف اذا يرضى اطلع او لا


حنان : اوف منج انزيين
( حنان رفيجة الزين حييل حيييل من ايام الثانويه وكل شي يقولونه حق بعض..حنان برونزيه ولون شعرها بني يعني شكلها لاتيني حيل بس وايد حلووه وجذاابه وجسمها حلو وروحها حلوه وطيوبه)


حنان : السلام خالتي شلوونج؟؟


ام عادل : هلا حنونه حبيبتي شلونج؟


حنان : الحمدالله بخير..خالتي زيونه فوق صح ؟


ام عادل : اي حبيبتي صعديلها اهيه بغرفتها


راحت فوق حنان وطقت باب غرفتها والزين افتحتلها الباب


الزين : حنووووون (وباستها ولمتها حييل)


حنان : يه يه شالحب كله..شالمناسبه؟


الزين : واااي حنوون حدي طاايره من الفرحه مستااانسه


حنان : دوووم يارب...انزين شنو صار قوليلي


الزين : اخيـــرا تخرجت من الثانويه وناصر يقدر يخطبني من ابوووي واااي مو مصدقه ناااصر يصيير ريلييي


حنان: والله تكونين احلى عرووس بالدنيا..بس زيون يعني عندج امل راح يوافق؟


الزين : مادري مرعوبه حدي خايفه انه ما يواافق بس بحاول اكلمه بالموضوع وان شاء الله يواافق لازم يواافق امووت لو ما يواافق..خلاص ابيي ناااصر ما عاد اقدر اتحمللللل


حنان: انزين انزين مع ويهج ليش قاعده تصارخين علي!!خلاص يوافق ان شاء الله يوافق


( ابو عادل شخصيته وااايد قوييه ومثقف حيـل وماخذ دكتوراه في الاداره وله منصب كبير حيل في شركه معروفه بالكويت)...


مارينا كرسنت


عادل شاف وحده حلوه مرت وقام يغني: ما اروعك أعجب وأغرب من الخيااال ملكتي كل سحر الجماال


ناصر: انت وبعدين معاك؟ والله لك خلق من صباح الله خير


عادل : انت اشتبي طق في بالي اغني وغنييت فيها شي!!


ناصر: لا يبه خلاص ماااا فيها شي انزيين...متخيل عادل بقالنا سنه ونتخرج خلاص


عادل : اي والله الأيام تركض يا خوي


ناصر: ما ودك تتزوج وتستقر؟


عادل: هههههاااااااي ضحكتني...انا اتزوج؟ شايفني ويه زواج انا؟ لا يبه تو النااس على الزوااج


(دق تلفون عادل...مريم الطويله تتصل بك)...عادل من كثر البنات اللي يكلمهم كان يخربط بينهم فيكتب شغله معينه تخص البنت عشان يتذكرها


عادل: هلا برووحي وحبي الأول والأخير


ناصر: وليييييين الحين هذا متى يخلص؟
(قام دز مسج حق الزين)


"ياريــتج انتي معااي بدال هالشي اللي مجابله,,,حبيبتي ولهااان عليــــج حيـــل"


البنات صارلهم حوالي ساعتين قاعدين بالغرفه يسولفون ويطالعون تلفزيون


حنان: يلا عاد زيون زهقت خل نطلللع


الزين: اممم وين تبين نروح؟


(وصل المسج حق الزين وفز قلبها وقامت انقزت من فراشها بتروح اتييب موبايلها على التسريحه)


حنان : شوي شوي على نفسج ما راح يطير المسج


الزين : اوش جب المسج من نصوووري (وقرته وضحكت وكتبتله: وي بعد قلبي مسكين حراام بس تستاااهل محد قالك اطلع معاااه تحمل عاد ومثل ما وصيتك هااا...نصوري عادي اطلع مع حنون نروح السوق؟)



(وصل المسج حق ناصر واستانس وافتحه على طول وقرا المسج وضحك بس ما اعجبه ان تبي تطلع قام دزلها: زيونه حبيبي بس عاد طلعتي وايد هالأيام قعدي بالبيت شوي اوكي قلبي؟)


الزين : حنون سألته اذا يصير نطلع مو راضي


حنان : اوووف هذا جذي قبل الزواج وبعدين شلون


الزين : بس كيفه نصوري يحقله يتحكم فيني مثل ما يبي


المارينا كريسنت


ناصر: خل نروح نحدق ما ودك؟


عادل : اي والله خل نشوفلنا يوم نكلم الربع ونروح


( من بعيد ياي واحد صوب طاولتهم)


عادل : هلاااااااا بالغالي شلوونك؟؟


عبدالرحمن: هلا فيك والله بخير شلونك انت؟


عادل: حياك حياك عبود وهذا رفيجي ناصر


عبدالرحمن: هلا والله ( وسلم على الأثنين وقعد معاهم جنه ما صدق)


(عبدالرحمن رفيج عادل بالاداب طويل بس اقصر من ناصر وعادل ومجسم وحليوي وهاااادي و خوش واحد)


عادل : شالصدفه الحلوه شيايبك المارينا؟


عبدالرحمن : والله ماكو فاضي ما عندي شي قلت خل ايي اتمشى على البحر شوي...وانت شلوك وشلون الأهل؟


عادل : والله ماشي الحال كلهم بخير


عبدالرحمن : وشلون الزين تخرجت صح؟


(اهني ناصر فجأه قلب ويهه وتنرفز ليش قاعد يسأل عنها اهيه بالذات والغيره كلت قلبه)


عادل : اي والله تخرجت الحمدالله


عبدالرحمن : اي كليه ناويه تقدم؟
( اهني عصببببب اكثر ناصر ويبي يعرف ليييييش ليييش وايد هامه جذي وقاعد يسأل عليها!!)


عادل : والله ناويه ان شاء الله تدخل علوم اداريه..ليش تسأل؟


عبدالرحمن: هااا اممم لا ماكو بس لان اختي هذي اخر سنه لها بالثانويه ومحتاره لما تتخرج اي كليه تدخل


( رد عبدالرحمن ما دش عقل ناصر وتنرفز جان يقوم من مكانه)


عادل : ها وين رايح؟


ناصر : اترخص انا يا جماعه تذكرت اني مواعد خواتي اليوم


عادل : لا شنو وين ماشي؟ شفيك نسيت انا ياي معاك؟!


( ناصر تذكر كان ناسي)


عبدالرحمن : اشدعوه يبه انا أوصلك بعدين


ناصر : متأكد؟ اخاف وراك شي


عبدالرحمن: لا يا خوي ما وراي شي ترخص انت لا تحاتي


ناصر : يلا تسلم ما قصرت فمان الله


( ومشى ناصر وعلى طول دق على الزين )


..بأي وقت يرن تلفونها وتسمع الرنه المخصوص اللي حاطتها حق ناصر اغنية محمد المسباح يفز قلبهااا


يفوق الوصف حبي لك يفوق الوصف...
يفوق الوصف شووقي لك يفوق الوصف...
يا فارق حيل عن غيرك..سطى في قلبي تأثيرك...
وكل ما جيت أعبر لك...تغلبني تعابيرك


الزين : هلا والله بدنيتي كلهااا


ناصر : هلا فيج يا عمري...ها شتسوين؟


الزين : والله ماكو قاعده مع حنون وحاسيين بملل


ناصر : اي عادي ولا تطلعين..اقول زيونتي حبيبتي بسألج؟


الزين : اسأل قلبي اللي تبيه


ناصر: تعرفين واحد اسمه عبدالرحمن من ربع اخوج؟


الزيـن : اي اعرفه شايفته اكثر من مره


ناصر اهني انفعل: شنووو؟؟ شنو شايفته اكثر من مره؟؟ متى؟؟ وييين؟؟


الزيـن : نصور حبيبي هدي شفيك عصبت!! صادفته جم مره بره بيتنا لما ايي حق اخوي ومره بالأفنيوز لما كنت طالعه مع اخوي بس عمري ما كلمته


ناصر : انزين انزين خلاص يلا مع السلامه


الزيـن : لحظه لحظه نصور شفيك؟؟ شصاار الحين؟ ليش تسأل؟


ناصر : بس عمري ماكو شي خلاص


الزيـن ( بدلع) : يعني حبيبي مو زعلان مني بشغله؟


ناصر : لا يا عمري وانا استرجي ازعل منج!


الزين : عيل قول انك تحبني


ناصر : احبـــــج


الزيـن : وبعد؟


ناصر : امووووت عليـــــــج اعشقج حد الجنوووون متيم فييييج


الزيـن : بس بس خلاص لا تكثر استحييييي


ناصر : امووت على اللي يستحي انا


الزيـن : يالله حبيبي راد البيت؟


ناصر : اي انا بالسياره راد البيت واخوج ظل بالمارينا ومواعد خواتي اطلعهم اليوم


الزيــن: وييييييين ؟


ناصر : يبه قلنالج خواتي ما قلنالج احد ثاني


الزين (بدلع) : ابي انا اللي بس اطلع معاااك ما يصير جذي


ناصر: بعد عمررري والله وانا ما ابي اطلع الا معااااج


الزيـن : يلا بس صكر ما احبك تتكلم وتسوق ديري بالك بالطريج


ناصر : يلا قلبي انتي احبببببج...بــــاي


(بعد 10 دقايق طلت الزين من الدريشه تشوفه اذا وصل او لا جان تشوف سياره جاكوار حمرا صافطه بره )


الزين : لااااااا هذي شيااااابها الحييييين اووووف خل الحق ادق على نصوو
ر
حنان : واي شفيج تصروعتي شصاار؟؟ منو اللي شيابها؟؟


الزين : صبري صبري...الو نصور حبيبي لا ترجع البيت


ناصر: ليش ما ارجع؟! توج تقوليلي ارجع البيت؟!


الزيـن بعصبيه : بس ناصر لا ترجع شوفلك مكان ثاني او رد حق اخووي


ناصر : حبيبتي شفيج؟؟ شصاار؟! ليش؟


الزين : بـــــــــــــس


ناصر : لا اشكره في شي!!! أصلا انا اقل من 5 دقايق واووصل!!


الزيــن : اووووووف


امممم الحين منو هذي ام الجاكوار الأحمر؟؟
الجزء الاول تـــــــــــــم

القصة روووعة

كملي قلبووو

مشكوووووره خيال الروح على المرور

انشالله رح اكملها بس خليني اشوف الردود

تهبببببببببل القصه

كملي يا قلبي ..

حلوه القصه كمليهاااااااااااااااااااااااااااااااااااااااااااااااااااااااااااااااااااا

كملي القصة بليييييييييييز

مشكوووووووووووووورين على المرور رح اكملها

الجزء الثــاني

ناصر وصل البيـت وعرف ليش قالتله الزين لا يرجع وضحك

ناصر : اهاااا انزيــن عشان يعني بنت خالتي جنان ببيتنا

الزيـن : اي بس ما ابيــك تشوفها وتشوفك وانت تعرف ان هالبنت ما ابلعهااا

ناصر : حرام عليج شسوتلج اهيه

الزيـن : بس ما ارتااحلهااا!! نصور حبيبي خلاص يعني لازم تدخل البيت الحين!!

ناصر: خلاص عاد زيون ما تثقين فيني انتي!! اشدعوه يعني شبيصير

الزين : اووف خلاص بس لا تاخذ تعطي وياها وتعطيها ويه وايد

ناصر : زين يبه زين يلا حبيبتي بااي

الزيـن بحزن : بـــاي

بيت بو ناصر

ناصر: السلام عليــكم

ردوا اللي قاعدين عليه وكانوا ناديه ونور وجنان,,,,وجناان شكلها كان جنه ماا صدقت انها تشوفه

نور: هلا والله بأخووي حبيبي شلوونك؟؟

ناصر : بخيـر الحمدالله دامكم بخير...حياالله جنان

جنان ( بحيا ) : الله يحيـك

( جنان عمرها 19 سنه تدرس في الجامعه الأمريكيه معجبه بناصر ولد خالتها من زمان وعلى طول تحاول تلفت انتباهه بس اهوه يعتبرها حالها حال اخته...جنان حنطاويه وشعرها أسود كاريه وحلوه وقصيره شوي فتحب تلبس الكعوب العاليه دايما)

ناصر : يلا عن اذنكم يا جماعه

نور : تعال تعال وين رايح

ناصر : ليش شنو فيه خير؟

نور: اختي قالت ان على اساس بتطلعنا تغدينا بره اليوم !!

ناصر : اي صح انا قلت هالكلام بس والله توني ماكل ودايخ وبنام شوي ميخالف مره ثانيه

نور :انت كله دايخ!! لا لا ما يصير ترجع بكلامك

ناديه : خلاص نور ميخالف الريال تعبان

نور : اووف انزين

ناصر : يلا عن اذنكم ..وصعد غرفته واخذ شاور وبعدين طلع لقى مسج من الزين

( ها حبيبي شقاعد تسوي؟ ) ورد عليها: اخذت شاور والحين يا قلبي بنام شوي احسني دايخ

وارتاحت الزين من المسج وناصر نام

الساعه 6 المغرب قعد ناصر من النوم وغسل وبدل اهدومه وطلع من غرفته وشاف امه بالصاله

ناصر : ها يمه شلونج؟

ام ناصر: هلا فيك عمري صح النوم

ناصر: والله نمت وايد ما حسيت بروحي...يمه الوالد مو في البيت؟

ام ناصر : اي يمه في البيت قاعد في مكتبه

ناصر : وما كلمتيه على الموضوع؟

ام ناصر : لا بعد قلت انا ووياك نروح نكلمه...امش الحين نروحله

طقوا عليه الباب وكان في رد " تفضل"

( ابوه وايد شديد وريال جاد ويحب الهدوووء والانتظااام )

ناصر : قوه يبه شلونك؟ ( وراحله وباس راسه )

بو ناصر: هلا فيكم...انا مشغول الحين خير في شي؟

ام ناصر : يا بو ناصر بغينا نكلمك بموضوع بخصوص ناصر

بو ناصر : خير شنو في؟

ام ناصر: انت عارف ان ولدنا ناصر كبر واسم الله عليه باقيله جم سنه ويتخرج وحاب يكمل نص دينه ويتزوج الزين

بو ناصر: شنو يتزوج؟! خل يكمل تعليمه ويتخرج ويكون نفسه بالأول!! ولا ناوي نصرف عليه وعلى زوجته!!

ناصر حس باحراج من كلام ابوه

ناصر : يبه انا البنت احبها وتحبني من زمان لي متى نظل جذي من غير زواج!! واذا على سالفة مصاريفنا لا تحاتي انا مستعد اشتغل وادرس بنفس الوقت...

بو ناصر: لا طبعا انا ما ابيك تشتغل وتتزوج عشان تهمل دراستك اخر شي!! خلاص عطوني مهله افكر بالموضوع

ناصر : يبه طلبتك...( وابوه ما عطاه فرصه يكمل)

بو ناصر: قلتلك بفكر بالموضوع خلاص

وطلع ناصر وامه من المكتب

ام ناصر : يمه حبيبي انا اعرف ابوك يعاند بالموضوع اول شي وبروحه راح يطيخ وتعرفه صج شديد وجاف بس صدقني طيب..عسى خير

ناصر : خير ان شاء الله

راح غرفته وقعد يفكر ويفكر ان اهوه مواعد الزين ان يخطبها اول ما تتخرج من الثانويه وقعد يفكر ويحاتي ومتخوف من قرار ابوه
( ناصر وايد وايد يحترم ابوه وما يقدر يرفضله طلب وابوه انسان عصامي كون حياته وتعب لحد ما وصل للمراكز اللي وصلها من غير ما يعتمد على احد )

دقت نور على ناصر الباب

نور : ناصر ممكن ادخل؟

ناصر :اي تعالي نور حياج

نور : يلا ناصر بتصير الساعه 7 خل نطلع نغير جو عفيييه ضايق خلقي

ناصر : مع ان حاس بدوخه بس يلا امشي وقولي حق اختج

نور : هيـــــــااااااا

ولبسوا وناصر دز مسج حق الزين قالها ان بيطلع مع خواته

الزيـن ردت عليه : انزين عمري دير بالك على رووحك وطمني عليك لما ترجع أحبـــك
بيت بو عادل

الزين بروحها في غرفتها وحنان راحت بيتهم من فتره و قاعده تطل من الدريشه ناطره تشوفه واهوه طالع

طلع ناصر مع خواتي وكان مغتر هالمره وشكله حيـــل انيـق ومرتب وحلو

الزين شافته وخقت عليه ودزتله مسج: يمه ينني بنسفة غترته

ناصر طل على دريشتها وبينت عليه شوي وضحكلها

وراحوا تعشوا بره وارجعوا حوالي 10:30 بليل ولما دخل البيت لقى ابوه قاعد بالصاله الرئيسه تحت ودخلوا كلهم وسلموا عليه وبيمشون

بو ناصر : ناصر تعال ابيك شوي

ناصر تصروع : خير يبه امرني

بو ناصر : انا موافق وقول حق امك تعطي خبر حق الناس ان نروحلهم السبت الياي

ناصر : صجججج يبه ( وشق حلجه وكان وده يركض يلمه ويبوسه)

بو ناصر : شفيك مو على بعضك اثقل شوي

ناصر : اسف يبه مشكور ما قصرت وحب راسه ومشى واهوه طاير من الفرحه وعلى طووول رااح حق امه

ناصر : يمممه يمـــه سمعتي الخبرر

ام ناصر : خير خير شنو في قول؟؟

ناصر : ولدج راح يعررررس وانتي عطي خبر حق الناس نروحلهم السبت الياي

ام ناصر( فرحت حيــل حق ولدها ولمته ولا شعوريا عيونها دمعت واهيه تشوف ولدها فرحاان ويتراقص بالبيت ويغني )

ام ناصر تضحك عليه : بس عاد اثقل شوي

ناصر : مو قادر مو مصدق اخيــرا ان شاء الله الزين بتكووون لي.

وراح غرفته وعلى طوووول دق على حبيبته
الزيـن : هلا عمري رجعت؟
ناصر: الزيـــــــــن قلبي عندي لج خبر بمليوون دينار

الزين : قول بسرعه شنو الخبر؟؟

ناصر : تقولين شنو؟

الزيـن : بس عاااااد نصور قول حرقت اعصاااابي

ناصر : انزين انزين....زيون بعد أسبوع بتقدملــج

الزيـن سكتت نست كل الكلام مو عارفه شتقول

ناصر : حبيبتي شفيـج؟! اقولج ياي اتقدملج بعد يومين!! ويــنج؟؟ لا يكون مو موافقه؟!

الزيـن : اي مو موافقه!! شنو مو موافقه؟! موافقه ونص وثلاث ترباع

ناصر : بس عاد ثقلي شوي

الزيـن تضحك : بعد عمري احبـــك وايــد امووت عليك

ناصر : وانا اموت عليج يا رووحي

رااحت ركض الزيـن على امها تقولها الخبررر وحدها مستانسه والام فرحانه من فرحة بنتها

الزيـن : يمه تتوقعين ابوي راح يوافق؟

ام عادل : ان شاء الله يوافق ونحاول كثر ما نقدر نخليه يوافق وخليه علي

الزيـن : الله يســــــمع منـــــــج

صارت الساعه 11 جان يدق ناصر على عادل
ناصر : وينك فيه يا خوي؟
عادل : هلا بالحبيب والله قاعد بالدوانيه مع الربع
ناصر : يايلك عيل انا الحين

عادل : حياك الله انت تييني بأي وقت

ناصر قرر ان يبلغ اخوها بالأول ويستأذنه لان رفيجه من عمر ولازم يكون اول من يعرف

عادل : هلا والله حياك حياك

ناصر : الله يحييك وسلم عليه وقاله : شوي عادل ابيك بس بكلمه بيني وبينك

عادل : اي اي تعال امش بره عيل ( طلعوا بره الدوانيه ) خير شنو في؟

ناصر : عادل انت تعرفني من عمر وتعرف انا من اكون وكل شي عني

عادل : اي اكيد

ناصر : انا حاب اخطب اختك الزيـن

عادل : اختي!!!!

ناصر : اي والله انا معجب فيها وبأخلاقها وكافي ان اختك

عادل : انت والنعم فيك وهذي الساعه المباركه وبالعكس ما راح تلقى واحد مثلك وانا ما راح القى نسيب احسن منك وخذاه بالأحضان ونااصر ارتاااح ان اخوها موافق....يلا امش امش داخل

ناصر : لا والله اخوي تعبان وحاس بدوخه شوي بروح انام

عادل : يا اخي تعال اقعد شوي

ناصر : يلا عشانك بس ( ودخلوا )


بعدين ناصر رجع البيت و ظل طول الليل يفكر ومو قادر ينام من الفرحه والزين نفس الشي مو قادره تنام وتفكر ومستاانسه بس تحاتي ابوها شنو بيقول..وأخيرا ناموا الأثنين


ثاني يوم الصبح

ام عادل وبو عادل كانوا قاعدين بالصاله

ام عادل : يا بو عادل ابي اقولك خبر بيفرحك ان شاء الله

بو عادل نزل الجريده : قولي شنو في ؟

ام عادل : بنتك الزيـن يايين يخطبونها السبت الياي

بو عادل : يخطبونها ؟! منو اللي ياي يخطبها ؟

ام عادل : ولد ييرانا ناصر تعرفه

بو عادل : اي اعرفه وخوش ولد بس لا انا مو موافق

ام عادل : ليش يا بو عادل مو موافق؟ البنت صارت بعمر زواج!

بو عادل : شنو عمر زواج!! زيونه الصغيرونه حبيبتي توها متخرجه من الثانويه!! لا لا انا مو موافق

( بو عادل على كثر ما شخصيته قويه حيـل لكن حنووون على بنته بالذات ووايد يخاف عليها ويدلعها اخر دلع واييبلها كل اللي بخاطرها فيه واذا كان تعبان او متضايق اول وحده يفكر يقعد معاها اهيه بنته لان ببرائتها تنسيه كل همومه)

ام عادل : بس لازم ناخذ رايي البنت ومن حقها تقرر وتشوف اللي يناسبها

بو عادل : لا هذي ياهل وما تعرف وين مصلحتها

ام عادل : بو عادل الناس يايين وكلموني وقلتلهم حياهم الله ويايين السبت الياي وعلى الأقل استقبلهم واخذ واعطي معاهم ما يصير نرفض جذي على طول

بو عادل قام بعصبيه : قلتلج مو موااافق يعني موو مواافق

الزيـن كانت نازله واسمعت الحديث اللي دار بينهم اخر شي ونغزها قلبها لما اسمعت ابوها يصرخ انه مو موافق وعيونها دمعت..ومسحت دموعها وراحت حق امها

ام عادل : الزيـن
الزيـن : يمه سمعته شقال..( وبطتها بجي ) يمه ما يصير لازم يعرف اني احبه وما أقدر اعيش من دونه

ام عادل : لا شفيج انتي ينيتي لو بيعرف ان كان بينكم شي يذبحج...قلتلج خليه علي

الزيـن : يمه انزين ابوي عمره ما رفضلي طلب لو اكلمه يمكن يوافق

ام عادل : بصبر عليه يهدى شوي واكلمه

بعد شوي جان يدخل عادل ومسحت دموعها بسرعه الزين وما خلته يشوف وييها ومشت.

عادل : شفيها بنتج اول ما ييت مشت؟!

ام عادل : بقولك شي حبيبي

عادل : قولي

ام عادل : رفيجك ناصر يبي يتقدم حق اختك

عادل : اي ادري كلمني امس بليل وكنت بقولج بس رديت لقيتج نايمه وناصر رفيجي من عمر واعرفه زين وخوش ولد ما تلقى احسن منه... ليش يعني زين قالت انها ما تبي تتزوج؟

ام عادل : لا البنت ما قالت شي وبالعكس قالت خل نعطيهم فرصه اييون بس المشكله ابوك مو موافق

عادل : ليش مو موافق؟

ام عادل : يقول انها صغيره على الزواج ولازم تكمل تعليمها

عادل : انا اروح اكلمه الحين

الزين منسدحه على فراشها وتبجي وماسكه صورة ناصر وحاضنتها

شوي ولا يدق ناصر بس ما تبي تشيله كاانت متضااايقه حيـــل وتبجي وما تدري شتقوله...

عادل راح يكلم ابوه

عادل : يبه ابي اكلمك بموضوع شوي

بو عادل : اذا على طاري زواج اختك لا تتعبون روحكم

عادل : يبه البنت ماهي صغيره وانا اعرف الولد واهوه رفيجي وريال خلووق ويخاف ربه وما راح تلقى احسن منه

بو عادل بعصبيه : انا قلت زواج الحين لا يعني لا

وصار نقاش حاد بين عادل وابوه استمر فتره واخر شي طلع عادل من البيت معصب
رجع تلفون الزين يدق ( جنوني يتصل بك) وما قدرت تمسك نفسها ما تشيله وشالته

الزيـن : هلا عمري

ناصر : ها شفيج حبيبتي دقيت عليج 3 مرات ما شليته؟

الزيـن : سوري قلبي ما كنت عند التلفون...شلونك حبيبي؟ ولهااانه عليييك وااايد

ناصر : وانا اكثرر يا عمري بشكل مااا تتصورييين ابيييج ابييج الحييين

الزيـن ( وتحس قلبها قاعد يعتصر) : حبيبي بس عاد صبرت كل هالمده ما تقدر تصبر بعد؟

ناصر : لا شنو وين اصبر بعد؟ لا لا ما اقدر خلاص ترى شوفي لو ما تصيرين مرتي بأقرب وقت بتكون نهاية علاقتنا( يقولها على ضحك)

الزيـن : خلاص عيل انا بنهيها قبل ما انت تنهيها زيييين

ناصر : لا لا لحظه لحظه وطنيه اقصد زين خخخخ

الزيـن : مليييييييق
ناصر : اي ادري من زمان الله يعينج علي,,,,يبه شفيج قاعد أضحك معااج توه.. انا ما يبعدني عنج الا الموووت

الزيـن : وااي اسم الله عليك قلبي ان شاء الله يومي قبل يومك

ناصر : لاا تفااولين على روووحج ترى الحين احمق عليج سحبيــها

الزيـن : لا ما اسحبهاا لوو شنووو؟؟ انت من صجك؟ لو انت مو في الدنيا انا شبي فييهاا!! امووت أذبح روووحي

ناصر : بس بس اسم الله عليج شنو هالكلام لا تقولين جذي فال الله ولا فالج

الزيـن : حبي وقلبي وعمري انت

ناصر: يا بعــدي ...أحبــج

الزين : مو أكثررر منيييي

ناصر : باي عمري

وصكوا الخط وانزلت تحت تشوف الأوضاع وشافت امها قاعده بالصاله تبجي

الزيـن : يمه شفيــج تبجيـن شنو في؟

ام عادل : اخوج وابوج تهاوشوا واخوج طلع معصب وادق عليه جهازه مغلق

الزيـن : لا يكون بسببي؟

ام عادل : اي كان عن موضوعج وكان يحاول يقنع ابوج

وقامت الزيـن بسرعه وعلى طول راحت حق ابوها

ام عادل : تعالي وين رايحه تعالي

الزيـن طقت الباب على غرفة ابوها ودخلت

الزيـن : يبــه

بو عادل : هلا قلبي تعالي تعالي...شفيج حبيبتي عيونج محومره جذي؟

الزيـن لمته حيـــل وقاعده تبجي وتقوله :يبه ما ابيك انت واخوي تتخانقون بسببي

بو عادل : لا حبيبتي عادي يصير هالشي بكل بيت...تعالي تعالي قعدي معاي صارلي يومين منشغل ما قعدت معاج
وقعدوا على القفنه ( الكنبه ) وحاطه راسه على صدره

بو عادل : يلا سولفيلي عنج وقوليلي شلون العطله معاج ؟

الزيـن : عادي يبه ماكو ملل...يبه بغيت اكلمك

بو عادل : خير حبيبتي قولي

الزيـن : يبه انت ما تبيني اتزوج عشان خايف لا تفقدني؟

بو عادل : رجعنا حق هالموضوع!!! يبه بعدج صغيره تو الناس لاحقه على الزواج

الزيـن : يبه انت بتظل ابوي وتاج راسي ودنيتي كلها وتأكد انت اكثر انسان راح افقده اذا تركت البيت ويحز بقلبي ان ممكن اروح بيوم واخليك بس صدقني عمرك ما راح تخسرني

بو عادل : لا انا قلتلج انتي صغيره ولا يعني لاا

الزيـن دمعت عيونها : يبه

بو عادل : قلتلج لا...وشاف عيون بنته تغورقت دموع واهني نغز قلبه وما يتحمل يشووف بنته الصغيره تبجي ما تحمل ولا شعوريا ادمعت عيونه وحضنها حيــــــل

والزيـن مو مصدقه ابوي يبجي علي... ابوي اللي عمره ما هزه شي قاعد يبجي عشاني

الزيـن واهيه تبجي : يبه أحبك الله لا يحرمني منك

يو عادل ساكت ما يدري شيقول وخانقته العبره يشوف بنته بهالطريقه واهو حاس ان بنته تبي الزاوج يتم وتبي هالانسان ومو عارف شلون يجبر بخاطرها واهوه اللي عمره ما رفضلها طلب

بو عادل : زيونه يبه

الزيـن : عيون زيونه

بو عادل : انتي شكلج تبين الريال صح؟ لا تتقصين علي

الزيـن سكتت

بو عادل : قوليلي حبيبتي لا تخافين

الزين : اي يبه

بو عادل : حبيبتي خليني افكر بالموضوع هاليومين انزين

الزيـن : اللي تشوفه يبه وباست ايده وراسه وحضنته حيـل وطلعت

بيت بو ناصر

يوم الثلاثا الساعه 7 الصبح

قام من النوم ناصر ومعرررق حيـــل وحاس انه تعباان وجسمه كله يعوره ويحس بصعوبة تنفس ويحس وقام يصرخ ينادي امه

ناصر يصرخ : يمــه يمــــــه

ناديه اسمعته وياته على طول : شفيـــك ناااصر شفيــــك؟
؟
ناصر : تعباان تعبااان حران مو قادر اتنفس

ناديه : يمه يمممه

يات ام ناصر ونور وحتى ابوه قام من النوم مفزوع

ام ناصر : يمه ولدي شفيه ولدي ؟؟

بو ناصر : بسرعه نور دقي على الاسعاف

نور راحت ركض وايدها ترجف وتحاول تدق على الاسعاف وتبجي بجي

بعد ربع ساعه يات الاسعاف وخذوا ناصر المستشفى بس ما حسوا في بيت بو عادل على الاسعاف لان صفارة الانذار ما كانت شغاله والوقت كان الصبح امبجر حيــل

ووصلوا المستشفى ودخلوا ناصر العنايه وسووا الفحوصات الازمه عشان يعرفون شفيه ومرت ساعات وكلهم بالمستشفى قاعدين ينطرون بالاستراحه وام ناصر تبجي وناديه تخفف عليها ونور بصدمه وابوه قاعد بزاويه بعيده عنهم
بعد 3 ساعات قاعدين بالمستشفى بس ينطرون ويسألون ويبون اي احد يعطيهم خبر عن ولدهم شفيه

الدكتور عبدالمحسن : السلام عليكم..انتو اهل ناصر فيصل...

ام ناصر : اي اي نعم ولدنا

تقدرون تتفضلون الحين عند ناصر والحمدلله حالته مستقره واحسن من اول

وراحوا ركض حق غرفة ولدهم وشافوا حالته كان شكله تعباان حيــل ولونه بااهت

ام ناصر : يمه ولدي حبيبي وحضنته حيــل وتبجي

ناصر : شفيج يمه منو مات؟ شوي شوي

ام ناصر : اسم الله عليك يا قلبي انت ما تشوف شر وقاعده تقرا عليه المعوذات وايات قرانيه

وكلهم سلموا عليه وقعدوا عنده والدكتور أشر من بعيد حق بو ناصر ان يبيه بره وطلع بو ناصر وراحله

الدكتور : ممكن تتفضل عندي بو ناصر شوي بالمكتب

بو ناصر : اي تفضل

وراحوا المكتب ودخلوا قعدوا

بو ناصر : خير شفيه ولدي؟

الدكتور : انا راح اكون صريح معاك واقولك كل شي

بو ناصر بتوتر : اي تكلم دكتور ولدي شفيه؟

بو ناصر انصدم لما قاله الدكتور ولده شفيــه وسكت مصدوم وخانقته العبره

تم الجزء الثــاني

يا ترى شنو فيه ناصر؟؟ تابعوا الجزء الثالث قريبا :d:wink_smile:[/COLOR][/COLOR]

القصه حدها عجيبه انا قريتها كامله لا تفوتكم بنات اقروها تابعوها حلوه حييييييييييييييييييييييييييييييييييييل

اي صح القصه رووعه

بس وينكم شدعووه ما عجبتكم الروايه

تهبل

بلييييز كمليهاا

عشانج يا خيال رح اكمل الجزء الثالث

وين الردود شدعووه ماعجبتكم الروايه

الجــزء الثــالـث

بو ناصر بتوتر : اي تكلم دكتور ولدي شفيه؟

الدكتور : شوف يابو ناصر من أعراض ولدك اللي اهيه الدوخه الدايمه والحراره الشديده,,, وبعد الفحوصات الأوليه والأشعه اللي سويناها..

بو ناصر: اي دكتور شفيه قولي

الدكتور: يا بو ناصر ولدك عنده لوكيــميا ( سرطان الدم)

بو ناصر حاشته صدمه وقلبه كان يدق وحس بخوف عمره ما حسه بحياته

الدكتور : تعرف شنو لوكيميا اخ بو ناصر؟

بو ناصر : اي اكيد اعرف بس شلوون؟!!!!!! متى ياله هالمرض ؟؟!!!!

الدكتور : عندكم احد من الأهل فيه سرطان الدم الحين او قبل؟

بو ناصر : على حد علمي لا

الدكتور : وايد أسباب وعوامل ممكن تؤدي لمرض السرطان بس اهم شي ان الحين شلون نعالجه وسرطان الدم يحتاج العلاج الفووري لان ينتشر بسرعه لكن يبيلنا بعد فحوصات عشان نعرف شنو نوع السرطان الدم اللي عنده

بو ناصر : دكتور انصحني شسوي؟؟ اخذه بره يتعلاج احسن

الدكتور : بيني وبينك اكيد يفضل العلاج بالخارج لان سرطان الدم من اخطر انواع مرض السرطان ويحتاج علاج مثكف ومطور حيـل مو متوفر بالديره..وطبعا لازم نعرف شنو نوع السرطان الدم اللي عنده و ان شاء الله راح نعرف هالشي بعد فحوصات واشعه اكثر

بو ناصر : اي خلاص باخذه يتعالج بره ان شاء الله

الدكتور :وأنا وصيك على مستشفيات ممتازه موجوده في المانيا توفر العلاج حق هالمرض

بو ناصر : يعطيك العافيه...انزين دكتور ولدي يعرف باللي فيه؟

الدكتور : لا بعد ما خبرته قلت اقولك بالأول وانطر حالته تستقر اكثر

بو ناصر : انا ابي اكون موجود بس تقوله

الدكتور : اي اكيد بو ناصر..ولا يهمك

وقاموا وطلعوا بره وبو ناصر حايشته صدمه باللي قاعد يصير ومو مستوعب
وماشيين رايحين غرفة ناصر

في غرفة ناصر بالمستشفى

ناصر : لحد يقول حق الزيـن اني بالمستشفى

نور : بس اكيد بتسألنا عنك...شنقولها؟؟

ناصر : انا اكلمها واقولها اي شي بس لازم ما تعرف

ناديه : انزين بس مفروض تعرف شفيك

ناصر : لا انا اعرفها زيـن ماا تتحمل كلش..تذكرين لما مره بس ايدي انكسرت شصار فيها...لا لا مابي احد يقولها شي ولا يحسسها بشي وان شاء الله اليوم او باجر اطلع من المستشفى

ام ناصر : اللي تشوفه حبيبي

ناصر : بس محتاج احد اييبلي موبايلي

ام ناصر : ولا يهمك نييبلك اياه يمه

شوي جان يدخلون الدكتور وبو ناصر وكان باين بو ناصر مو على بعضه ومتوتر

بو ناصر: ها حبيبي شلون صرت؟ ان شاء الله أحسن

ناصر بينه وبين نفسه يقول اووله كنت لازم اطيح مريض وادخل المستشفى عشان تقولي " حبيبي "!!...
(ابوه كان جاف حيـــل ويتكلم مع عياله برسميه زايده بس واهوه شايف ولده جذي طايح مكسور ضعيـف حن قلبـه غصبن عليه)
ناصر : الحمدالله يبه وايد أحسن

بو ناصر : الحمدالله

ناصر : دكتور متى اقدر اطلع من المستشفى؟

الدكتور : ان شاء الله لما تخلص كل فحوصاتك ونتأكد ان حالتك خلاص مستقره نخليك تطلع

ناصر : يعني جم يوم؟

الدكتور : يعني تقدر تقول يومين اذا مو أكثر

ناصر : وي دكتور يومين وايد!! لا ان شاء الله مو أكثر

الدكتور : يلا يا جماعه لازم تخلون ولدكم ينام شوي ويرتاح

ام ناصر : خل ينام ويرتاح انا بتم عنده وانتو روحوا

ناصر : لا يا يمه ميخالف روحي البيت انتي وارتاحي وردي المغرب

ام ناصر : لا لا مابي بظل عندك

بو ناصر: وبعدين معاج خلي ولدج يرتاح...يلا يبه احنا ماشيين دير بالك على روحك وراجعينلك المغرب

ناصر : خلاص تمام ويبولي موبايلي عفيه

نور : ولا يهمـــك انت تامر امر

(وكلهم سلموا على ناصر وطلعوا من غرفته وركبوا مع السايق اللي كان ناطرهم بره وردوا البيت)

حوالي صارت الساعه 4:30 العصر والزيـن ينت واهيه تدق عليـه من الصبح وما يشــيييله !!
الزيــن : لييييييش مااا يشييييله ليــــش!!!

ولما حاولت شكثر تدق عليه الصبح وما يرد جان تدق على البيت وشالته الخدامه وسألته عنه بس الخدامه ما تدري عن شي لان كل اللي صار كان الصبح امبجر

ودقت على تلفون نور بعد بس هم ما كانت تشيله لان نور كان وقتها اخر همها تاخذ موبايلها معاها!! ( الزيـن عندها رقم نور من زمان ومرات يطلعون مع بعض وفرق بينهم سنتين وكانت الزين بنفس الثانويه اللي فيها نور الحين)

الزيــن تكلم نفسها: يعني مو معقوله جذي!!! سيارته موجوده واهو بالبيت ومحد يشيله ومحد يرد علي!!!

نور شافت المس كولز اللي على تلفونها لما ارجعت بس ما ردت دقت عليها لان ما تدري شتقولها عن ناصر اذا سألتها عنه!!!

الزيـن بينها وبين نفسها : يارب ما يكون صار فيه شي...يارب ما يكون صار فيه شي!!!

صارت الساعه 5 ومشوا بو ناصر وام ناصر وخواته رايحين المستشفى

وبس وصلوا ودخلوا عليه لقوه نايم وما حبوا يزعجونه جان تحط ام ناصر الموبايل يمه وراحوا يقعدون في استراحة المستشفى

نور : ناديه دقت على زين مرتين بس ما رديت دقيت عليها مادري شقولها!!خفت ارتبك واقولها كل شي

ناديه: والله صج صعب بس المفروض تعرف انه بالمستشفى

نور: بس ترى صح كلام ناصر احتمال اذا اعرفت فيه شي تقوم اهيه تتعب بعد ومو وقته

ناديه: تهقين يعني؟

نور: من صجج!! زين تموت على ناصر بشكل مو طبيــعي وانا اعرفها اكثر منج واعرف سوالفها معاه...يحليلها كانت تضحكني ايام الثانويه وتتذكر وتضحك

ناديه : ليش شنو كانت تسوي؟

نور: رفيجاتي كلهم كانوا خاقين عليه ويسألوني عنه دايما واهيه شنو تغااار و تقوم تتهاوش معاهم وكان اكره ما عندها لما اخوي مرات ياخذني من الثانويه وتعصـب حيـل خخخخخ

ناديه : خخخخ يحليـلها

الساعه 5:30 تقريبا صحى ناصر وشاف موبايله على الطاوله اللي يمه وطل عليه ولقى 37 مس كول و5 مسجات
طل على المس كولات ولقى ان 27 مس كول من الزيـن والباجي من ربعه

وفتح المسجات لقى اثنين من الزيـن
" حبيـــبي ليــش ما ترد علييي ويــــنك؟؟"

والمسج الثاني : " ناااصر طمني عليـــك قاعده احترررق ويــــنك؟؟ رد عليييي تكفه "
ناصر قاعد يفكر شيقولها من غير ما يحسسها بشي او يجرح مشاعرها جان شوي ويرجع يدق التلفون " عشـقي الزيـن يتصل بك "

ناصر ارتبك مادري يشيله او لا بس قرر يشيله ويسترسل

الزيـن : نااااااصر ويــــــنك؟؟حبيبي فيك شي؟؟ صارلك شيي؟؟؟؟

ناصر: هلا بالزيــن كله... لا لا ما فيني الا كل خيــر عمري

الزيـن : ناصر اكيييد احس ان فيك شي وماتبي تقوولي؟؟

ناصر : يا عمري خلاص قلتلج ما فيني شي

الزيــن : عيـــل ويييييينك كل هالفتره ما ترد علي؟؟؟!!!

ناصر : حبيبتي توني صاحي من النوم وكنت حاطه سايلنت

الزيـن : توك قاعد من النوم!!! اول مره تقعد للحزه؟! ليش اي ساعه نايم امس؟!

ناصر: نمت متأخر والله وما وعيت الا توه قبل شوي

الزيـن : وليش نايم متأخر؟؟ شكنت تسوي؟

ناصر: ماكو سهران اطالع ديفيديات كنت يايبها

الزيــن : واااي نصور خرعتني عليك والله بغى يوقف قلبي..لا تسويــها مره ثانيه

ناصر : ان شاء الله عمري انتي

الزيـن : شنو ناوي تسوي اليوم؟

ناصر: والله شكلي ما راح اتحرك من فراشي كلش وانتي؟

الزيـن : اي احسنلك خلك بالبيت لا تطلع خخخخ..انزين نصور انا ودي اطلع صارلي جم يوم مو طالعه

ناصر : يا سلام انا تقوليلي اقعد بالبيت وانتي تبين تطلعين!! لا لا بتصير الساعه 6 وانا ما احبج تطلعين طلعة بنات عقب هالوقت الا اذا كنت معاج...مااكو طلعه

الزين: لا لا خلاص حرررمت اطلع عقب هالوقت مابي بعد تصير مشاكل ما تسوى... نصور بروح بيت رفيجتي غدوور مع حنون..عفيه نصوري من زمان مو شايفتها خل اروحلها

ناصر : انزين روحي بس خل حنان اللي تمرج ولا تتأخرين عن الساعه 9

الزيــن : بس جذي!! ان شــاء الله عزز الطــلب

ناصر: يلا حبــي بــاي

( ناصر يقصد " الا اذا كنت معاج" مو ان يطلع معاها بس لما اهيه تبي تطلع مع رفيجاتها وبليل اهوه يروح نفس المكان اللي اهيه بتروحله ويراقبها من بعيد عشان يحاتي احد من الشباب يضايقها او يتحرش فيها وتهاوش جم مره مع شباب من قبل بسبب جذي فعشان جذي ما قامت تحب تطلع بليل مع رفيجاتها )

شوي جان يدخلون الأهل على ناصر بغرفته

ام ناصر: ها حبيبي صحيت؟

ناصر: اي اي يمه تعالوا تعالوا..

ودخلوا كلهم سلموا عليه وقعدوا معاه ودردشوا وقعدوا لحد الساعه 9 بليل وانتهت وقت الزيارات ومشوا
في بيت بو عادل الساعه 9:10 كانت الزيـن بالبيت ودزت مسج حق ناصر انها وصلت وكانت قاعده مع امها بالصاله
الزيـن : يمه...ابوي لحد الحين ما رد علي خبر عن قراره؟

ام ناصر: الظاهر يبي ينطر الناس اييون ويقعد معاهم

الزيـن : بس اهوه قالي هاليومين راح يكلمني!!! بعرف اذا اهوه على الأقل في مجال يوافق او لا ؟! ابي اعرف يمه وارتاااااح

ام ناصر : خلاص حبيبتي لا تحاتين وانا اعرفه ابوج طيب وبالنهايه راح يلين

يوم الأربعا الصبح

صحى ناصر من النوم الساعه 9 تقريبا وسووله فحوصات اكثر عشان يحددون شفيه بالضبط ويتأكدون من الفحوصات الأوليه والاجراءات الطبيه الثانيه

الدكتور : ها ناصر شلونك اليوم؟

ناصر: والله احسني احسن دكتور

الدكتور : الحمدالله

ناصر: دكتور لحد الحين ما عرفتوا اشفيني بالضبط؟

الدكتور : احنا بس ناطرين نتايج الفحوصات الأكيده وبنقولك على طول

صارت الساعه 11:30 الصبح وناصر حاس بملل مو طبيبعي وكان داز مسج حق الزيـن يصبح عليها بس ما ردت عليه لان بعدها نايمه وشوي جان تدق الزيـن

الزيـن : صبـاح الخيــر

ناصر: وين صباح الخيـر؟ بنصير الظهر الحين

الزيـن : سوري حبيبي لان توني قاعده من النوم واشوف المسج

ناصر: صباح الحب والشوق والاحساس وكل شي حلو

الزيـن : يا روووحي ولهانه عليـــك حيــل...شنو هذا مر جم يوم من غير ما اشوفك؟!!

ناصر: عشان اعطيج فرصه تشتاقيـلي

الزيـن : لا والله اي اي قص علي أكثر.....شقاعد تسوي؟

ناصـر: ماكو قاعد اطالع تلفزيون...وشلون طلعتج امس؟

الزيـن : تمام والله حلوه....نصور قاعده احاتي ما يقبلوووني بالعلوم الاداريه

ناصـر : لا لا انا متفائل ومتأكد ان بيقبلونج

الزيـن : واي ما صدق بعدين راح اشوفك بالكليـه كل يوووم

وتسمع الزيـن امها تناديها من تحت

الزيـن : نصوري لازم اروح امي تناديني

ناصر: يلا حبيبتي انزين وسلميلي على خالتي

الزيـن : الله يسلمك

مر اليوم وما كان فيه شي يديد...اهله عنده نفس كل يوم والزيـن لحد الحين ابوها ما رد عليها
يوم الخميـس الصبح الساعه 10

كان قاعد ناصر يطالع تلفزيون ولا شوي ويدخل عليه الدكتور وابوه وكان باين على ويه ابوه التعب ومتضايق حيـل

الدكتور وبو ناصر : صباح الخيـر ناصر

ناصر : هلا والله صباح النور ( ناصر كان مخترع حاس ان في شي )

الدكتور : ناصر ان شاب ناضج وواعي وعارف ان كل شي يصير بحكمة الله وقدر الله وما شاء فعل

ناصر: اي طبعا اكيد...خير دكتور قولي انا شنو فيني؟

الدكتور: انا طبعا مجبور اني اكون صريح معاك وما اخش عنك شي

ناصر: اي

الدكتور: بعد الفحوصات اللي سويناها عرفنا شنو المرض اللي فيك

ناصر: اي شنو ؟؟؟

الدكتور : انت عندك سرطان الدم

ناصر: شنو؟؟ سرطان الدم!!!!

( ناصر قلبه قام يدق حيــل وقام يتنفس بسرعه)

الدكتور : ناصر شوي شوي ( وقاعد يساعده ان يهدى ويتنفس طبيعي)

ناصر ظل ساكت وقاعد يحاول يستوعب وبعدين قال حق الدكتور

ناصر: وشنو مدى خطورة هالمرض؟

الدكتور: اهوه طبعا مرض خبيث يصيب الخلايا اللي تكون الدم الموجوده في النخاع العظمي وله انواع مختلفه ووسائل علاج مختلفه حسب كل نوع...وللأسف اكشتفنا ان عندك سرطان الدم الحاد و الخلايا السرطانيه منتشره بجسمك وتحتاج علاج كيميائي بالخارج

ناصر بعده ساكت حايشته صدمه وقاعد يحاول يستوعب كلام الدكتور

بو ناصر: ناصر باذن الله انت قدها وراح تقاوم المرض وترجع احسن من اول

ناصر: انزين دكتور جم نسبة نجاح العلاج عندي ؟

الدكتور: ما اقدر احددلك بالضبط وتفرق من شخص لي شخص ومدى تقبل جسمه للعلاج...واحتمال كبير انك تتعالج وفي ناس وايد قبلك تعالجوا منه لكن ان شاء الله اذا تعالجت منه راح نحتاج كل 3 او 4 اشهر انك تطل علينا ونتشيك على صحتك ونتأكد ان ما يرجع

ناصر: يعني دكتور حتى لو تشافيت منه ممكن يرجعلي مره ثانيه؟؟!

الدكتور : امكانية عودة المرض للمريض موجوده لكن صغيره ومو شرط

ناصر: شكثر مدة العلاج الكيميائي؟

الدكتور: يختلف من مريض لي مريض وحسب تجاوب الجسم ومدى انتشار السرطان...يعني ممكن شهر شهرين او حتى سنه وأكثر

ناصر: والعلاج فيه خطوره؟

الدكتور : ما اقص عليك ان هالعلاج له جوانب وايد سلبيه وتختلف هالجوانب حسب نوع العلاج الكيميائي لان هالعلاج ما يدمر بس الخلايا السرطانيه لكن ممكن يدمر الخلايا السليمه بعد لكن الأعراض ممكن تكون دائمه او مؤقته مثل تساقط الشعر , فقدان الشهيه وتشتت في التركيز وغيره

ناصر: مثل شنو الأعرض الدائمه؟

الدكتور : راح اكون صريح معاك لكن ممكن هالعلاج يسبب الى العقم

ناصر بصدمه : العقـم!!!!

الدكتور : بس ما اقولك ان هالشي اكيد راح يصير لكن احتمال كبير يصير هالشي لان في انواع من العلاج الكيميائي تسبب العقم نسبة 80%

ناصر: ممكن تخلوني بروحي الحين

بو ناصر: تعوذ من الشيطان وربك الشافي ولا تهتم حق هالكلام العلمي وكل شي بأيد ربك

ناصر : يبه ممكن تخليني بروحي شوي

الدكتور قام وقال : ناصر اذا بحبيت تسألني وتستفسر بعد عن اي شغله انا حاضر

ناصر: يعطيك العافيه دكتور

وغمز الدكتور حق بو ناصر بمعنى خل يطلعون شوي بره ويخلون ناصر على راحته

ناصر قاعد يحاول يستوعب الكلام اللي انقاله بينه وبين نفسه...مو قادر يصدق!!! انا فيني السرطان!!! شلون جذي!! متى!!! ليــش!!! وبعدين استغفر ربه وقاعد يحاول يستوعب ان هالشي قضاء وقدر
خلاص حلمي ان اخذ شهادتي واتخرج ضاع...وزيــن اااااخ يا زيـــن شلون اقولج انا عندي المريـض الخبيــث وممكن اموت بأي لحظه وممكن اظل طول حياتي اتعالج من هالمرض!! وحتى لو تعالجت ممكن يرجعلي!!!!! شلون تتزوجين واحد ممكن يصيـر عقيــم!!

وقام ناصر يبجي بحرقه على روحه وعلى كل احلامه اللي ضاعت وعلى زيــن!! زين حبيبة قلبه وعمره!!!
بينه وبين نفسه...شقول حق زيـن؟؟! شقولها!!!لو تعرف ان فيني السرطان واحتمال اموت راح يصير فيها شي!!...لا لا مابي امرمط زيـن معاي واخليها تعيـش بتعاسه وطول حياتها بالمستشفيات ...لازم زيـن تكمل حياتها وتشوف مستقبلها..زيـن تستاهل واحد احسن مني..واحد ممكن يعيشها بسعاده ويكون لها أسره...لازم اخلي زيـن تتركني...لازم اخليها تكرهني,,,اااااااخ يا زيـــن

تــــم الجزء الثالــث

تتوقعون راح يقدر يخلي الزيـن تكرهه؟؟ تشوفون معاه حق باللي قاعد يفكر يسويه؟؟

يعطيج العافيه,,,

وينكم شدعوه ما عجبتكم الروايه