قصائد للمبدع محمد بن فطيس المري ..

1 >> قصيدة يا قو قلبك

يا قو قلبك على الصده و يا صبرك
و يا وسع صدري على صدك و يا صبري

و يا طول عمرك بذاكرتي و يا كبرك
و يا شيب عيني بشيب و عاد ذا كبري

و الله لو إن حمل صبري فوقك إن تبرك
و الله ولو تعتذر منت بعلى خبري

إن ماجبرك الغلا ما أقدر على جبرك
ياللي على أرض الوفا ما بشبرك بشبري

تزعل و ترجع و تلقاني على خبّرك
و أنا أنكسر لك و أجيك أدوّر لجبري

طيفك و ذكراك طيلة غيبتك سبرك
و شوقي لشوفتك طيلة غيبتك سبري

أمحق وليف و محبة .. و إلا أقول .. أبرك
حسبي عليك أعشقك و أنت تحفر قبري


2 >> قصيدة شطرٍ حفظته

ماني بمن ياتي و لا يدرى به
شطرٍ حفظته ما اعرف كتابه

شطرٍ يناسبني لمثل الليله
و آشوفني في ذا المكان أولى به

أباتكل بالله و نعمٍ بالله
اللي ما يوصد دون خلقه بابه

باقول و اللجنة تقيم قولي
و من كثرة الشعار ماني آبه

الحمد لله واثقٍ من روحي
و إن كنت ذيبٍ فالرجال ذيابة

ما أقول أنا أشعر واحدٍ في العالم
لكن قصيدي كفو و أنا ادرى به

الشعر جمعنا لو تفرقنا
حدودنا و ظروفنا الغلابة

الله يبيض وجه راعي الفكرة
عز الله انها تنحسب لحسابه

و الله يبيض وجه من يرعاها
محمد الله يحفظه لأحبابه

محمد ولد زايد عريب المجنى
ولي عهد الديرة الخلابة

الشعر تاريخٍ لنا من مبطي
و إعلامنا يوم السنين نهابة

الشعر بيتٍ و الوزن عمدانه
معناه طنب و قافيته حجابه

الشعر وادٍ فيه صيدٍ واجد
و كلٍ على الوادي يهج ركابه

و الأفكار صيد و كل شاعر قانص
و كلٍ يدسم شاربه مخلابه

أحدٍ خياله حر .. و أحدٍ وكري
و أحدٍ خياله كوبجٍ بقطابه

و أنا خيالي كل ما هديته
حول على الوادي و صاد عقابه

شاركت أمثل ديرتي و ربوعي
و كلٍ يمثل ديرته و أقرابه

و الله إلى الله راد و الله قاله
إني لاسلمها الفخر و كتابه

داري قطر و أنا هنا أمثلها
المجد مطلوبي و أنا طلابه

عهدٍ علي إني لاشرف داري
ترْك صبيٍْ ما يعز ترابه

شوفوا دمي من حبها عنابي
و حماستي من ضوها شبابه

شاعر خليجي و العروبة بيتي
و البيت ما ياقف بدون أطنابه

و إن عودت بين القبايل فزعة
أنا أشهد أن لي في اللوازم لابة

لي في القبايل ربع .. و أقدْرهم
ماني بمن يجهل مقام أصحابه

و إن عودت لأصلي فأنا أصلي مرْي
من صلب يام أهل القنا و خضابه

قومٍ لنا فوق المعالي بيرق
و السيف قوة سلْته بنصابه

الشعر طوْقني و أنا طوْقته
قمت آتمشى به و أفك أبوابه

يا بنت ياللي تفرقين بعودش
ما ألومهم لا كثروا الخطابة

لا مر بش دربش على خلق الله
قالوا كذا .. بالإصبع السبابة

زينش يزينه فعل أبيش و جدش
و أنتي بدورش للنقى كسابه

قومي تباهي بي و فلي راسش
عليش من ستر الشرف جلبابه

و إن ما سترتش بالفعول و باسمي
فعقبني الفنجال يا صبابه


3 >> قصيدة ودي بك

ودي بك .. و أبيك و أباك و أبغاك
جمعتها لرضاك و أختار فيها

شف ويش منها يتبع أحكاك و رضاك
و اللي لك أسقي مسمعك لا ضميها

غديت أفر حكاي و أساير حكاك
و أنا تشرف لكنتي و أهتويها

مضمونها ودي بشوفتك و أهواك
يالي دروب أهل الردى ما تجيها

صانك ولي أمرك و حبّك و داراك
و لا قدر رد الحظوظ و مجيها

نفسك مهذبها و عزالله رباك
ما يدري إن جيش الهيام يغزيها

يامرك قلبك بالوفاء لي و تنهاك
ناسٍ على لاماك تفرك يديها

رزين عقل و من مزايا مزاياك
نفسك تحب و عفتك تمتطيها

يا عزوة أخوانك و مطلب هذولاك
ناسٍ محبتك والدك تدعيها

ناسٍ تخدم أبيك كله لعيناك
و هوّ يحسب إن الله عليه يهديها

يا جعلها تفدى على الأرض ماطاك
و الله و منهم مثلها يبتليها

لكن لعب بي يا وليفي تغلاك
و نفسي غلاك من الصدود يحديها

تبطي علي و أنا هنا و أتحراك
و كبدي لواهيب الصبر تشتويها

كانك مشكك في الغلا و الوفاء ! هاك
جوالي أقر القائمة كل أبيها

رقمك مع الصادر و لا وارد سواك
و الناس في اللي ( لم يرد عليها)

و أياك و أياني و أياني و أياك
من غيبةٍ من دون عذر يحميها


4 >> قصيدة ضيقة عصّير

الضيقه إلّي دايم تالي عصير
وش حيلتي و أردها لاتجيني

لا طال ظل العود حزة عشا الطير
كنها على سجن الحديد تحديني

يضيق صدري كل ما جات و أسير
و لا يخفف سوج رجلي حنيني

لا حولنا مشرّاف و لا أقدر أطير
يالله قسمة خير لا تبتليني

و عقارب الساعه توقف عن السير
ما كن في الدوحه سواتي حزيني

و العبرة إلّي تاصل الحلق و تحير
يا قربها لو قيل لي يا عويني

أمِل شوف الناس وِرد و مصادير
و إلّي يقول شفيك كنه يهجيني

يعني على ما قيل من باب تصوير
( لا أحدٍ أبي قرّبه و لا أحدٍ يبيني )

أروح أدور خط ما به دواوير
و أدور إلي هادها تهتديني

و آخذ مع الهاجوس سجه و تفكير
و أراجع إلّي فات بيني وبيني

و أحسّب ذنوبي و أدور لتكفير
عساي ما قصّرت في والديني ؟!

و عساي ما قارنت من ينفخ الكير
و إلّي يحمل المسك جعله قريني

و يطري علي يوم الحشر و أطلب مجير
ما أعطى كتابي في شقيقة يميني

و يطري علي صدقان كثر الدنانير
إلّي تعاديني إلا كثر ديني

و راع الهروج إلّي سوات المناشير
أصد عنه و أدري إنه يعنيني

الله حسيبة يوم عرض القوارير
و الله حسبي من صواب مكيني

وإلا طرا لي واحدٍ كانه صغير
أما أصغر بيومين ولا سنيني

دريت وش قومي و عينت تفسير
للضيقة إلّي من زمن تعتريني

حبه بصدري سالفة سر في بير
و كن الفواد يقول هذا **يني

أشفق على علم يجي منه من غير
ما يسمع إلّي سولفوا به .. ونيني

العام أجيهم من حساب المسايير
و اليوم حال عداي وينه ؟ و ويني ؟

يا كثرهم غيرة ولكن خبر خير
ما غير شوفه في الوجود يهنيني

رايي كذا يا عاشقين الغنادير
ماله على وجه البسيطه وزيني

خطاي تعليق الأمل في المدابير
إلين راح و شفت حقري بعيني

صبرٍ جميل و خابر إنها مقادير
و الله على تخفيف حزني عويني

ذي حالتي لين أتغبا الشمس و أصير
معطى سراحي عقب ما أنا سجيني

و إلا أمتلأ جوف الشجر بالعصافير
طلبت من رب العباد يهديني

يعتقني المذن عقب ضيقة عصير
إلّي على سجن الفراق تحديني

الله الله على ابن فطيس يسلم راسه

تسلمين حبيبتي كل وحده احلا من الثانيه

رووووعه ..
صح لسانج أنتي والشاعر ..

رررررررررررررررررؤعه الله يعطيج العافيه يا قلبي

الله يعافيكم يالغاليات

؟؟؟؟؟؟؟؟؟؟؟؟؟؟؟؟؟؟؟؟؟؟؟؟

ياسلااام يبتيها على العووق أنا من عشاق بن فطيس
وأزيد على أبياتج الروعه بيتين له أحبهم
ماتعودت أترجا وآترشا
لاتهملني وتاكلك الحسايف
الأمل مثل الهوا لا طال عشا
وانت بصرك يالغلا ويش إنت شايف>>من روائع بن فطيس
مشكوووره ع النقل حياتي

العفو قلبي >> و أنا بعد من عشاق هالمبدع